Bıyl 3 munaı-gaz hımııa zaýyty iske qosylmaq

NUR-SULTAN. QazAqparat – Atyraý oblysy men Shymkentte bıyl 3 munaı-gaz hımııa zaýyty iske qosylýy tıis. Bul týraly búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«Kómirsýtekterge álemdik baǵanyń turaqsyzdyǵy tehnologııalyq kúrdeli salalarǵa basymdyq berip otyr. Jol kartasyna sáıkes 2025 jyly eksportqa baǵdarlanǵan munaı-gaz-hımııa óniminiń óndirisin 9 ese ósirýdi qamtamasyz etý kerek», - dedi Premer-Mınıstr.

Osyǵan oraı Asqar Mamın Indýstrııa jáne ınfraqurylymdyq damý mınıstrligine 3 munaı-gaz hımııa zaýytyn bıyl paıdalanýǵa berýdi tapsyrdy.

«Energetıka mınıstrligine «Samuryq-Qazyna» qorymen birlesip, bıylǵy jyly Atyraý oblysy men Shymkentte 3 munaı-gaz hımııa zaýytyn iske qosýdy tapsyramyn. Jıyntyq túrde bul munaı-gaz hımııa óndirisiniń kólemin 400 myń tonnaǵa deıin arttyrýǵa múmkindik beredi», - degen Úkimet basshysy.