Bıyl 2 myńnan astam esirtki qylmysy tirkeldi

NUR-SULTAN QazAqparat - Osy jyldyń 11 aıynda ishki ister organdary 2273 esirtki qylmysyn anyqtap, esirtkini ótkizýdiń 1336 faktisiniń jolyn kesti. Bul týraly QR Іshki ister mınıstrliginen málim etti, dep habarlaıdy QazAqparat tilshisi.

Vedomstvo málimetinshe, aınalymnan 13 tonna esirtki, onyń ishinde 5,2 kg geroın, 114 kg-nan astam sıntetıkalyq esirtki tárkilendi. 9 uıymdasqan qylmystyq esirtki tobynyń qyzmeti toqtatyldy. Uıymdastyrýshylar men qatysýshylarǵa qatysty 17 qylmystyq is qozǵaldy, onyń sheńberinde 8 uıymdastyrýshy jáne 45 qatysýshy qylmystyq jaýaptylyqqa tartylady. 15 esirtki zerthanasy joıyldy.

«Sońǵy eki jylda bul saladaǵy ulttyq zańnama aıtarlyqtaı pysyqtaldy, esirtkiniń jańa túrlerine baqylaý ornatý tártibi jeńildetildi. Buryn esirtkiniń ár jańa túrin engizý jeke zań qabyldaýdy talap etti. Qazir Ádilet, Densaýlyq saqtaý jáne Іshki ister mınıstrliginiń esirtki zatynyń qaýiptiligi týraly qorytyndysy jetkilikti. Ol 1-2 aı ishinde Úkimettiń qaýlysymen memlekettiń baqylaýyna engiziledi. Sonyń nátıjesinde sońǵy eki jyl ishinde esirtkiniń 115 jańa túrine qatysty qylmystyq jaýapkershilik engizildi», - dep atap ótedi mınıstrlikten.

Mınıstrliktiń atap ótýinshe, 2020 jyldan bastap esirtki qylmystary úshin qylmystyq zańnamaǵa «elektrondyq baılanys júıelerin qoldana otyryp» jasalatyn esirtki qylmysy degen jańa túsinik engizildi. Bul quram esirtkini satý, olardy óndirýge arnalǵan zattardyń aınalymyn anyqtaý, esirtkini tutynýǵa tartý faktileriniń jolyn kesý úshin qarastyrylǵan. Bas bostandyǵynan aıyrýdyń uzaq merzimderi belgilene otyryp, qylmystar aýyr jáne asa aýyr qylmystar sanatyna jatqyzyldy.

Osy jyldyń basynan beri ınternet arqyly esirtki ótkizýdiń 97 faktisiniń joly kesildi.

Eń aýyr jaza qylmystyq top jasaǵan qylmys, bilim berý uıymdarynda jasalǵan qylmys nemese kámeletke tolmaǵan adamǵa esirtkini satqany úshin kózdelgen. Zań boıynsha mundaı qylmystarǵa 15 jyldan 20 jylǵa deıin bas bostandyǵynan aıyrý nemese ómir boıyna bas bostandyǵynan aıyrý jazasy qarastyrylady.