Bıyl 145 keliden astam sıntetıkalyq esirtki tárkilendi - UQK
Álemdegi esirtki bıznesi úshin esirtkini óndirý ornynan jan-jaqqa tasymaldaý mańyzdy bolyp otyr. Geografııalyq ornalasýy, tranzıttik múmkindikter, sondaı-aq shekaralyq shektesý jeriniń uzaqtyǵy Qazaqstan aýmaǵyn transulttyq esirtki qurylymdary úshin tartymdy etip tur. Osy oraıda olar aýǵandyq esirtkini el aýmaǵy arqyly kontrabandalyq ótkizý turǵysynda qarastyrady.
Ortalyq Azııa, onyń ishinde Qazaqstan arqyly aýǵan esirtki trafıginiń «soltústik baǵdary» ótip jatyr. 90-shy jyldardyń basynda qurylǵan bul baǵdar Reseıge ótip, ary qaraı Eýropoǵa qaraı jalǵasady. Sonymen qatar, Qazaqstanda esirtki jaǵdaıyna áser etetin taǵy bir faktor elimizdiń ońtústiginde kannabıs tobyndaǵy esirtkini óndirýge de qatysty bolyp tur.
Qazirgi ýaqytta qazaqstandyq jastar arasynda sıntetıkalyq esirtki túrleriniń taralýy qoǵam úshin qaýip tóndirip, eleýli problemaǵa aınalýda. Іri qalalarda sıntetıkalyq esirtkini ótkizý jaǵdaıy artyp keledi.
«Bıyl ulttyq qaýipsizdik organdary Nur-Sultan, Almaty qalalarynda, sondaı-aq Aqmola, Pavlodar jáne Batys Qazaqstan oblystarynda 12 jasyryn esirtki zerthanasynyń áreketin toqtatty. Jalpy, zańsyz aınalymnan 145 keliden astam sıntetıkalyq sıpattaǵy esirtki men 2,5 tonna hımııalyq prekýrsor tárkilendi», - delingen taratylǵan málimette.
Óndirilgen esirtki iri partııalarda kóleńkeli segmentinde áreket etetin esirtki dúkenderiniń ókilderine ótkizilip otyrǵan. Sonymen birge, esirtki úshin aqy elektrondy tólem júıesi arqyly qabyldanǵan.
