Bıyl 10 mln sharshy metr turǵyn úı paıdalanýǵa berildi
«Osy jyldyń qańtar-qyrkúıeginde óndiris kólemi 4,6 paıyzǵa ósti. Kórsetkishtiń ósimi 16 óńirde tirkeldi. Óńdeý ónerkásibi salalary boıynsha ósý qarqyny mashına jasaý óndirisinde 7,6%, onyń ishinde avtomobıl jasaýda – 17,8% jáne elektr jabdyqtaryn jasaýda – 11,5%, sondaı-aq azyq-túlik taýarlary boıynsha – 3,7%, sýsyndar – 7%, plastmassa buıymdary – 4,9%, daıyn metall buıymdary – 2,5%, hımııa ónerkásibi taýarlary – 10,7% jáne kıim óndirisinde – 7,3%-ti qurady», - dedi Á. Qýantyrov.
Onyń aıtýynsha, taý-ken ónerkásibinde óndiris kólemi 0,1 paıyzǵa ulǵaıdy. Salalar bólinisinde ósý taý-ken ónerkásibinde qyzmet kórsetýde – 18,4 paıyzdy, kómir óndirýde – 2,1 %, gaz jáne metall kenderin óndirýde 0,6 paıyzdy qurady.
«Bul rette óndiristiń ózge de paıdaly qazbalardy óndirýde 8,9 % tómendeýi tirkeldi», - dedi mınıstr.
Budan bólek ol atalǵan kezeńde oryndalǵan qurylys jumystarynyń kólemi 5,1 paıyzǵa artqanyn aıtty. Kórsetkishtiń oń ósýi 17 óńir boıynsha tirkeldi. Qurylys-montajdaý jumystarynyń eń joǵary ósýi Shymkent qalasynda, Qyzylorda, Aqmola, Almaty jáne Túrkistan oblystarynda baıqaldy.
«Bıylǵy qańtar-qyrkúıekte 10,5 mln sharshy metr turǵyn úı paıdalanýǵa berildi, bul 2021 jyldyń sáıkes kezeńinen 0,9 paıyzǵa artyq. Oń ósim 15 óńir boıynsha tirkeldi. Eń joǵarǵy kórsetkishter Túrkistan, Jetisý, Almaty oblystarynda jáne Shymkent qalasynda tirkeldi. Kórsetkishtiń tómendeýi Ulytaý, Mańǵystaý, Abaı, Atyraý oblystarynda, sondaı-aq Astana qalasynda baıqaldy», - dedi vedomstvo basshysy.
Budan buryn habarlanǵandaı, bıylǵy qańtar-qyrkúıekte Qazaqstan ekonomıkasynyń ósý qarqyny 2,8 paıyzdy qurady.
