Bitimgerlik operatsııalarǵa qatysatyn áskerılerdi irikteý erejesi bekitiledi

NUR-SULTAN. QazAqparat – Elimizde bitimgerlik operatsııalarǵa irikteýden ótken áskerı qyzmetshiler qatysady, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

QR Qorǵanys mınıstrligi «Bitimgershilik operatsııalaryna qatysý úshin Qazaqstan Respýblıkasy Qarýly Kúshteriniń áskerı qyzmetshilerin irikteýdi júrgizý qaǵıdalaryn bekitý týraly» buıryq jobasyn ázirledi.

Atalǵan vedomstvonyń habarlaýynsha, qujat qaǵıdalary Qazaqstan Respýblıkasy Úkimetiniń 2022 jylǵy 2 maýsymdaǵy №357 qaýlysyna sáıkestendirý maqsatyn kózdeıdi.

Áskerı qyzmetshilerdi irikteýdiń erejesin bekitý týraly buıryq jobasymen tolyǵyraq «Elektrondyq úkimet» veb-portalynyń «Ashyq NQA» bóliminde tanysýǵa bolady.

«Bitimgershilik operatsııalarǵa qatysý úshin Qazaqstan Respýblıkasy Qarýly Kúshteriniń áskerı qyzmetshilerin irikteý tártibi qaǵıdalary negizinde aıqyndalady. Áskerı qyzmetshiler bekitilgen qaǵıdalarǵa sáıkes irikteýden ótedi jáne «Qazaqstan Respýblıkasynyń bitimgershilik qyzmeti týraly» Qazaqstan Respýblıkasynyń Zańyna, sondaı-aq Qazaqstan Respýblıkasy Úkimetiniń 2016 jylǵy 10 maýsymdaǵy № 345 qaýlysymen bekitilgen bitimgershilik operatsııalarǵa daıyndyq qaǵıdalaryna sáıkes bitimgershilik operatsııalarǵa qatysady», - dep jazylǵan «Ashyq NQA» saıtynda.

Osylaısha atalǵan másele qoǵam nazaryna usynylyp otyr. 10 kúnnen buıryq jobasy qoldanysqa engiziledi.

«Áskerı qyzmetshilerdi irikteýdi josparlaý jáne iske asyrý, jalpy bitimgershilik qyzmet máselelerine QR Qorǵanys mınıstrligi jetekshilik etedi. Mınıstrlik Qazaqstan Respýblıkasy Qarýly Kúshteri Bas shtaby, Qazaqstan Respýblıkasy Qarýly Kúshteri jáne basqa da bólimshelermen ózara is-qımyl jasaı otyryp, Birikken Ulttar Uıymynan jáne basqa da halyqaralyq uıymdardan suraý salýlardyń kelip túsýine qaraı júzege asyrady», - delingen qujatta.