Bıshimbaev otbasy alıment tóleýden bas tartty – jazasyn óteýshiniń burynǵy áıeli
ASTANA. KAZINFORM – 24 jylǵa sottalǵan eks-sheneýnik Qýandyq Bıshimbaevtyń burynǵy áıeli Nazym Qaharman balalaryna beriletin alımenttiń únemi keshiktiriletinin jáne jaqynda Bıshimbaevtar otbasy ony tóleýden múldem bas tartqanyn aıtty.
Jarty saǵattyq málimdeme N. Qaharmannyń Youtube-arnasyna jarııalanǵan.
− Bıyl Kárimniń mektebine úsh transhtyń ekeýin Qýandyq pen onyń otbasy tólegen joq. Ótken jylǵy demalystyń eshqaısysy tólenbedi, tipti psıhologtiń qyzmetteri de tólenbedi. Al biz psıhologke óte kóp júgindik, sebebi basymyzdan ótken oqıǵa úlken psıhologııalyq soqqy boldy. Men barlyq shyǵyn somalaryn advokat Ǵazymjanovqa jiberip otyrdym. 1,5 jylda óte qomaqty soma shyqty. Biraq olar esh elemedi. Densaýlyq týraly, tipti aıtpaı-aq qoıaıyn. Eshbir dáriger shoty, dárýmender men dári-dármekterdiń quny tólenbedi, − deıdi.
Onyń aıtýynsha, alıment týraly kelisim 2020 jyly ajyrasý kezinde jasalǵan.
− Qýandyqta bizden ketip, eshteńe tólemeıtin tańdaý boldy. Biraq sotta, ata-ana quqyǵynan aıyratyn kezde ol bar jaýapkershilikti moınyna alatynyn jáne ony oryndaıtynyn aıtty.
Biraq men alımenttiń ózin únemi eske salyp, Baıan esimdi advokatqa habarlasatynmyn. Tipti dál qazir, bul vıdeony jazyp otyrǵan 28 naýryzda osy aıdyń alımenti áli aýdarylmaǵan, − deıdi.
Degenmen alıment qarasha-jeltoqsan aılarynda turaqty tólene bastaǵan, biraq bul uzaqqa sozylmaǵan.
N. Qaharmannyń aıtýynsha, 30 naýryzda oǵan Bıshimbaevtar otbasynyń advokaty habarlasyp, alıment tóleýden múlde bas tartatyndyqtaryn habarlaǵan.
Agenttik tilshisi Q. Bıshimbaevtyń advokaty Erjan Ǵazymjanovqa habarlasty, alaıda qorǵaýshy qysqa qaıyrdy.
- Ol málimdemeni rastamaımyn, - dedi.
Eske sala ketsek, Nazym Qaharman men Qýandyq Bıshimbaev 14 jyl nekede bolǵan. Olardyń úsh ortaq balasy bar jáne 2019 jyly eks-mınıstr jemqorlyq úshin abaqtydan shyqqanda ajyrasqan.
Al 2024 jyly 13 mamyrda Q. Bıshimbaev azamattyq nekedegi áıeli Saltanat Núkenovany óltirdi dep aıyptalyp, 24 jylǵa sottaldy.