Birinshi lıgada «Aqjaıyqty» utqan «Turan» kósh basyna shyqty

ASTANA. QazAqparat – Fýtboldan birinshi lıga komandalary arasynda el birinshiliginiń 13-týrynda Túrkistannyń «Turany» óz alańynda Oraldyń «Aqjaıyǵyn qabyldady», dep habarlaıdy QazAqparat tilshisi.

Ótken jyly premer-lıgada oınaǵan qos komanda bıyl joǵary topqa qaıta oralýdan dámeli edi.

Birinshi taımda-aq alań ıelerinen belorýssııalyq legıoner Vladıslav Lojkın 33 jáne 36-mınýtta qos gol soǵyp, match taǵdyryn sheship tastady deýge bolady.

Ekinshi kezeńde oraldyqtardan reseılik Evgenıı Kobzar 46-mınýtta esepti qysqartqanymen, 50-mınýtta gvıneıalyq Mamadý Dıallo oıyn núktesin qoıdy – 3:1.

Osylaısha, «Turan» 31 upaımen birinshi lıgada kósh bastady. Degenmen 29 upaıy bar «Elimaıdyń» odan bir oıyny kem. «Aqjaıyq» 22 upaımen tórtinshi orynda qaldy.

Eske sala keteıik, budan buryn birinshi lıgada «Aqjaıyq» fýtbol klýbynyń «Tarazdy» oısyrata utqanyn jazǵan edik.