«Birgemiz: Bilim»: SQO-da myńnan astam aýyl balasy joba aıasynda bilimderin shyńdamaq
- «Birgemiz: Bilim» jobasynyń kózdegen maqsaty ne?
- Jalpyulttyq joba halyqtyń áleýmettik jaǵynan osal tobyna jatatyn otbasylardyń jáne sonyń ishinde óńirdiń eldi mekenderinde turatyn balalardy qamtıdy. Maqsat – qala men aýyl arasyndaǵy bilim deńgeıiniń aıyrmashylyǵyn azaıtý. Oqýshylarǵa sapaly bilim berý
úshin volonterlerdi tartamyz. Oblystyń 13 aýdanyn, myńnan astam oqýshyny qamtýdy josparlap otyrmyz. Kópbalaly, turmysy tómen otbasylardyń balalaryna aǵylshyn tilin úıretip, ulttyq biryńǵaı testileýge daıyndalýǵa kómektesemiz, kompıýterlik, quqyqtyq saýattylyǵyn arttyramyz. Bul jumysqa pedagogıkalyq mamandyqtar boıynsha oqyp jatqan negizinen 3 kýrs stýdentterin, qalalyq, aýyldyq mektepterdiń ustazdaryn tartamyz.
- UBT ótti. Joba aıasynda mektep túlekterimen jumys istedińizder.
Nátıjesi qandaı?
- Qala men aýyl balalarynyń synaqqa daıyndyqtaryn salystyryp bolmaıdy, ol burynnan belgili. Aýdan ortalyqtarynyń keıbirinde qosymsha bilim berý ortalyqtary jumys istese, aýyl balalarynda mundaı jaǵdaı jasalmaǵan. Al áleýmettik jaǵynan osal topqa jatatyn otbasylarǵa repetıtor jaldaý múmkin emes. Sondyqtan bul jobanyń olarǵa kómegi zor. 56 akademııalyq saǵat bólingen. Mektep túlekterin UBT-ǵa ázirleý úshin oblys mektepteri muǵalimderiniń arasynan 39 volonter shyqty. Aldymen balalardyń bilimin tekserip, UBT-ǵa kiretin pánderden mamyr aıynda testileý ótkizdik. Oǵan 11 aýdannan 288 oqýshy qatysty. Osylaısha túlekterdiń osal tustaryn anyqtap, sonymen eki aıǵa jýyq jumys istedik. Ol úshin WhatsApp, ZOOM qoldandyq, keı mektepterge baryp, oqýshylarmen kezdestik.
Nátıjesinde jobaǵa qatysqan túlekterdiń 275-i testileýdi jaqsy tapsyrdy. Olardyń ortasha kórsetkishi 15% artty.
- «Birgemiz: Bilim» jobasyna jalpy qansha volonter tartylǵan?
- «Birgemiz: Bilim» óńirde bilim berý volonterliginiń negizin qalady dep aıtýǵa bolady. Jalpy bul jobaǵa 100 volonter turaqty túrde qatysady dep josparlap otyrmyz. Olar, buǵan deıin aıtyp ótkenimdeı, pedagogıkalyq mamandyqtar boıynsha oqyp jatqan
stýdentter jáne oblys mektepteriniń ustazdary. Olar balalarmen jumysqa kirispes buryn daıyndyqtan ótedi. Vebınarlar uıymdastyramyz, «Órleý» ınstıtýty fılıalynyń mamandary jáne Nazarbaev zııatkerlik mektebiniń oqytýshylary keńes beredi. Eń qolaıly degen ádistemeni tańdap alamyz. Qazir qoǵamdyq birlestikte volonterler pýlyna adamdar qabyldap jatyrmyz. Jobaǵa qatysqysy keletin pedagogtar men ustazdar arnaıy saýalnamadan ótedi.
Saraptamalyq keńes úmitkerlerdi iriktep alady. Nıet bildirýshiler az bolmaıdy dep oılaımyn. Joba aıaqtalysymen olardy baǵaly syılyqtarmen marapattaımyz.
- Karantındik shekteýler jobany júzege asyrýǵa túzetý engizgen bolar. Bul qıyndyqtan qalaı shyǵyp jatyrsyzdar?
- Árıne, karantınge baılanysty josparǵa ózgeris engizýge týra keldi. Biz sáýirden bastap qarasha aıyna deıin balalarmen jumys isteımiz dep oılaǵanbyz. Qazir mekteptermen jáne joǵary oqý ornymen baılanys ornatýda azdaǵan qıyndyqtar bar. Soǵan qaramastan bizdiń belsendilerimiz jumysty bastap ketti. Olar aýyl mektepteri oqýshylarynyń arasynda ótkizýge saýalnama ázirlep jatyr. Osy arqyly UBT-ǵa enetin qandaı pánder boıynsha balalarǵa kómek asa qajet ekenin anyqtamaq. Al qazan-qarasha aılarynda balalardy olımpıadaǵa daıyndaýdy bastaımyz. Óıtkeni ádette osy ýaqytta aýdandyq olımpıadalar bastalady. Alǵa qoıǵan maqsatymyzǵa qıyndyqtardy eńsere otyryp jetemiz.
- Suhbatyńyzǵa rahmet! Sáttilik tileımin!
