Bir aptada mas bolyp kólik aıdaǵan 270 júrgizýshi ustaldy

NUR-SULTAN. QazAqparat – «Qaýipsiz jol» aılyǵy aıasynda 46 myńnan astam jol erejesin deregi áshkerelendi. Bul týraly QR ІІM Ákimshilik polıtsııa komıteti tóraǵasynyń orynbasary Jandos Muratálıev aıtty, dep habarlaıdy QazAqparat tilshisi.

«Júrgizýshilerdiń, ásirese jolaýshylar tasymalyn júzege asyratyndardyń arasynda apatty turaqtandyrý jáne kólik tártibin arttyrý maqsatynda respýblıka aýmaǵynda «Qaýipsiz jol» aılyǵy bastalǵanyn bilesizder. Іs-sharanyń birinshi aptasynda jol júrisin qadaǵalaý kezinde 46 myńnan astam jol júrisi qaǵıdasyn buzý deregi áshkerelendi. Onyń ishinde 270 júrgizýshi avtokólikti mas kúıinde basqarǵany, 153-i qarsy jolaqqa shyǵyp ketkeni, 7 myńnan astamy jyldamdyq rejımin saqtamaǵany úshin jaýapkershilikke tartylǵan. Zańsyz qaıta jabdyqtaýdyń 400-ge jýyq deregi jáne manevr jasaý erejelerin buzýdyń 3 myńǵa jýyq deregi anyqtaldy. Sondaı-aq, jolaýshylardy zańsyz tasymaldaǵan 60-tan astam júrgizýshi ustaldy», - dedi Jandos Muratálıev ІІM baspasóz qyzmeti alańynda ótken brıfıngte.

Onyń atap ótýinshe, tehnıkalyq aqaýy bar, reıs aldyndaǵy tehnıkalyq baıqaýdan ótpegen kólikti paıdalanýǵa shyǵarǵany, sondaı-aq jolaýshylardy avtokólikpen tasymaldaý kezinde júrgizýshini medıtsınalyq tekserýden ótkizbeı kólik basqarýǵa jibergeni úshin 48 kásipkerlik sýbektisi ákimshilik jaýapkershilikke tartyldy

«40-qa jýyq ruqsat etilmegen turaq anyqtaldy. Odan bólek, atalǵan ýchaskelerdegi qozǵalys qaýipsizdiginiń deńgeıin arttyrý úshin avtojoldardyń apattyq qaýipti ýchaskelerine qosymsha tekserý júrgizildi. Naqtyraq aıtqanda, avtomobıl joldaryna 1,2 myń tekserý júrgizilip, 20 qaýipti oryn anyqtaldy. Joldy kútip ustaýdaǵy kemshilikterdi joıý úshin 749 uıǵarym berildi. Joldy kútip ustaýǵa jaýapty tulǵalarǵa qatysty 476 ákimshilik hattama toltyryldy. Qosymsha 350-ge jýyq jol belgisi ornatyldy», - dedi ol.