Bir aptada ınternet arqyly alaıaqtyq jasaǵan 261 kúdikti anyqtaldy

NUR-SULTAN. QazAqparat – Elimizde ınternet arqyly alaıaqtyq jasaǵan 261 kúdikti anyqtaldy. Bul týraly QR ІІM Krımınaldyq polıtsııa departamenti bastyǵynyń orynbasary Qanat Nurmaǵambetov aıtty, dep habarlaıdy QazAqparat tilshisi.

«Internet-alaıaqtyqtyń aldyn alý jáne ashý, olardy jasaǵan tulǵalardy anyqtaý ári ustaý úshin respýblıka aýmaǵynda 8-14 qarasha kúnderi «Haı-tek0 jedel aldyn alý is-sharasy ótkizildi. Búgin onyń nátıjeleri týraly málimettermen bólispekpin. Jedel aldyn alý is-sharasy ótkizilgen 7 kúnniń ishinde shamamen 300 qylmys tirkeldi», - dedi ol ІІM baspasóz alańynda ótken brıfıngte.

Onyń atap ótýinshe, is-shara barysynda buǵan deıin jasalǵan 440 ınternet-alaıaqtyq áshkerelendi.

«Jedel aldyn alý is-sharasy ótkizilgen kezeń ishinde mundaı qylmys jasaǵan 261 tulǵa anyqtaldy. Onyń ishinde 2-den kóp qylmys jasaǵan 34 alaıaq ustaldy. Olar 287 ınternet-alaıaqtyq jasaǵan», - dedi Qanat Nurmaǵambetov.