Byltyr túrmeden shyqqan Perýdiń burynǵy prezıdenti Alberto Fýhımorı qaıtys boldy

ASTANA. KAZINFORM — Sybaılas jemqorlyq jasady jáne adam quqyqtaryn buzdy degen aıyppen 16 jyl túrmede otyrǵan Perýdiń burynǵy prezıdenti Alberto Fýhımorı 86 jasynda el astanasy Lımada qaıtys boldy, dep habarlady onyń otbasy. Bul týraly VVS jazady.  

«Qaterli isikpen uzaq kúreskennen keıin ákemiz Alberto Fýhımorı jańa ǵana Jaratqanyna oraldy», — dep jazdy onyń balalary Keıko, Hıro, Sachı jáne Kendjı Fýhımorı X áleýmettik jelisinde.

Jazda Keıko Fýhımorı ákesiniń 2026 jylǵy saılaýda memleket basshysy laýazymyna taǵy da básekege túsýge nıetti ekenin habarlaǵan.

Perýdi 1990-2000 jyldary basqarǵan Fýhımorı bılik kezinde jasaǵan qylmysy úshin 25 jyldyq jaza merziminiń úshten ekisin ótep, ótken jylǵy jeltoqsanda raqymshylyqpen túrmeden bosatylǵan edi.  

Oǵan kóterilisshilermen kúresý úshin «ólim eskadrondaryn» qurdy jáne 1991-1992 jyldary 25 adamdy óltirýge qatysty, sondaı-aq memleket qarjysyn jymqyrdy jáne basqa da sybaılas jemqorlyq qylmystar jasady degen aıyp taǵyldy.

2000 jyly japon tekti Fýhımorı elden shyǵyp, Japonııaǵa ketti.

Eks-prezıdentke qatysty tergeýdi bastaǵan Perý bıligi ony ekstradıtsııalaýdy surady, biraq Japonııa odan bas tartty.

2005 jyly Fýhımorı kútpegen jerden Chılıge keldi, onda ol Perý orderi boıynsha tutqyndalyp, Lımaǵa jetkizildi. Ol óz eline ekstradıtsııalanǵan demokratııalyq jolmen saılanǵan alǵashqy kóshbasshy boldy.

2007 jyly ol 25 jylǵa sottaldy. Perý prezıdenti Pedro Pablo Kýchınskı 2017 jyly Fýhımorıdiń densaýlyǵyna baılanysty oǵan raqymshylyq jasaǵan bolatyn.

Sodan keıin Alberto Fýhımorı aýrýhana tóseginen jazylǵan málimdemede el azamattarynan keshirim surap, prezıdentke keshirim jasaǵany úshin alǵys aıtty, biraq ony bosatýǵa qatysty quqyqtyq daýlarǵa baılanysty alty jyldan keıin ǵana bosatyldy.