Byltyr Ózbekstanda 900 myńnan astam sábı dúnıege keldi

2023 jyly Ózbekstanda 900 myńnan astam bala dúnıege keldi, dep habarlaıdy Kazinform agenttiginiń menshikti tilshisi.

Ózbekstan Ádilet mınıstrliginiń baspasóz qyzmetinen málim etkendeı, byltyr respýblıka boıynsha 968 140 náreste týǵan. Onyń ishinde 466 563 qyz bolsa, 501 177 ul. Bul 2022 jylmen salystyrǵanda 28 360 balaǵa az.

Eń joǵary týý kórsetkishi Samarqand oblysynda tirkelgen. Onda ótken jyly 114 446 bala dúnıege keldi. Odan keıingi orynda Ferǵana (107 602 náreste), Qashqadarııa (102 364 náreste), Andıjan (89 680 náreste) jáne Surhandarııa (88 603 náreste) oblystary tur.

Qosa ketsek, 2024 jyldyń alǵashqy kúni Ózbekstanda 1 859 náreste dúnıege kelgenin jazyp edik.

Eske sala keteıik, demografııalyq boljamǵa saı, 2030 jylǵa qaraı Ózbekstan halqynyń sany 41 mıllıonnan asýy múmkin.