Byltyr óndiristegi jazataıym oqıǵa kezinde 202 jumysshy qaza bolǵan
ASTANA. KAZINFORM — 2024 jyly óndiristegi jazataıym oqıǵalardan 1408 jumysshy zardap shegip, onyń 202-i qaza bolǵan.
QR Eńbek jáne halyqty áleýmettik qorǵaý mınıstrliginiń Memlekettik eńbek ınspektsııasy komıteti málim etkendeı, 2024 jyldyń qorytyndysy boıynsha óndiristik jaraqattaný 2023 jylmen salystyrǵanda 4,5%-ǵa tómendedi.
2024 jyldyń qorytyndysy boıynsha óndiristik jaraqattaný koeffıtsıenti (1000 jumyskerge shaqqandaǵy jazataıym oqıǵalardyń jıiligi) 0,20 qurady.
— Respýblıkanyń ónidiristik aımaqtarynda jaraqat alýdyń eń joǵary deńgeıi saqtalýda. Máselen, Qaraǵandy oblysynda — 159 adam, ShQO-da — 124 adam, Pavlodar oblysynda — 112 adam, Abaı oblysynda — 101 adam, Qostanaı oblysynda — 91 adam, zardap shekken. Sondaı-aq, Almaty qalasynda 116 adam zardap shekti, — delingen habarlamada.
Ekonomıkanyń salalary boıynsha eń kóp zardap shekkender taý-ken metallýrgııa kesheniniń ónerkásipterinde — 18,3% jáne qurylys salasynda — 10,1%.
Jazataıym oqıǵalardyń oryn alýynyń negizgi sebepteri: óndiristegi jumystyń tıisti deńgeıde uıymdastyrylmaýy (35,5%); jábirlenýshiniń óziniń óreskel abaısyzdyǵy (31%); jol qozǵalysy erejelerin buzý (8,2%); eńbek qaýipsizdigi jáne eńbekti qorǵaý erejelerin buzý (7,6%).
Qaýipsiz eńbek jaǵdaıyn jasaý men óndiristik jaraqattanýdy azaıtý QR Úkimeti men Eńbek jáne halyqty áleýmettik qorǵaý mınıstrliginiń (budan ári — Mınıstrlik) negizgi mindetteriniń biri bolyp tabylady.
Sońǵy bes jyldyń ishinde memlekettik organdar men jumys berýshilerdiń eńbekti qorǵaý salasy boıynsha qabyldanǵan keshendi sharalardyń nátıjesinde óndiristik jaraqattaný deńgeıi 6,3%-ǵa tómendedi.
Profılaktıka men buzýshylyqty aldyn alý maqsatynda elimizdiń 3262 kásiporny qaýipsizdik pen eńbekti qorǵaý standarttaryn engizdi.
2019 jyldan bastap Mınıstrlik tarapynan «Nóldik jaraqat — Vision Zero» tujyrymdamasyn jetildirý boıynsha belsendi jumys atqarylýda. Oǵan búginde 605 kásiporyn qosyldy.
Qurylys obektilerinde bas merdigerdiń obektidegi eńbek qaýipsizdigi máseleleri boıynsha barlyq qosalqy merdigerlerge jaýapkershiligi men baqylaýyn kózdeıtin baqylaýdyń tik modelin engizý boıynsha jumys jalǵasýda. Bul baqylaý modelin respýblıkanyń 318 kásiporny engizdi.
Budan basqa, jumys berýshilerge eńbekti qorǵaý talaptarynyń saqtalýyn ózin-ózi tekserýden ótýge múmkindik beretin «Onlaın eńbek konsýltanty» elektrondyq servısi iske qosyldy. Servıs iske qosylǵan sátten bastap ony 42 985 jumys berýshi paıdalandy.
Qazaqstan Respýblıkasynyń 2024-2030 jyldarǵa arnalǵan qaýipsiz eńbek tujyrymdamasy iske asyrylýda, ol 4 negizgi baǵytty kózdeıdi. Bul táýekelge baǵdarlanǵan tásil negizinde eńbekti qorǵaýdyń ulttyq júıesin jańǵyrtý, jumys oryndarynda táýekeldi tómendetý jónindegi sharalardy ekonomıkalyq yntalandyrý, kásibı quzyrettilikter men ǵylymı áleýetti damytý, sondaı-aq eńbekti qorǵaý salasyndaǵy baqylaý men monıtorıngtiń tıimdiligin arttyrý. Tujyrymdamany iske asyrý óndiristik jaraqattaný men kásiptik syrqattanýshylyq deńgeıin tómendetýge yqpal etetin bolady.
Aıta keteıik, osyǵan deıin Rıdder jylý ortalyǵynda gaz-aýa qospasy jarylyp, 6 jumysshy zardap shekkeni anyqtaldy.