Byltyr Qostanaıda 214 adam esirtki qylmysy úshin sottaldy
ASTANA. KAZINFORM — Oblys prokýrory Marat Seksembaevtyń tóraǵalyǵymen oblysta zańdylyqty, quqyqtyq tártipti qamtamasyz etý jáne qylmyspen kúres jónindegi úılestirý keńesiniń otyrysy ótti. Bul týraly Qostanaı oblysy prokýratýrasy málim etti.
Otyrys barysynda esirtki qylmysyna qarsy is-qımyldyń tıimdiligi, sondaı-aq bıznes sýbektileri men ınvestorlardyń quqyqtaryn qorǵaý máseleleri qaraldy.
Keńes jumysyna quqyq qorǵaý jáne arnaıy organdardyń, oblys ákimdiginiń, memlekettik organdardyń jáne kásipkerler palatasynyń basshylary qatysty.
Otyrysty asha otyryp, oblys prokýrory 2025 jyly zańsyz aınalymnan 411 kg-nan astam esirtki quraldary men prekýrsorlar tárkilengenin, al 2026 jyldyń basynan beri 224 kg tárkilengenin atap ótti.
— Kórsetilgen kezeńde esirtki qylmystary úshin 214 adam sottaldy. 17 myńnan astam sheteldik banktik shottar buǵattaldy, sottyń sheshimimen 194 mln teńge somasyna tyıym salyndy. Shekaralyq ótkizý pýnktterinde esirtki quraldaryn ákelýdiń 67 faktisiniń joly kesildi, — delingen habarlamada.
Jyl basynan beri esirtki taratatyn 120 ınternet-resýrs buǵattaldy, «graffıtı» túrindegi olardyń jarnamasynyń shamamen 100 faktisi joıyldy.
Sonymen qatar, otyrysta esirtki ótkizý arnasyn, qylmystyq kiristerdi anyqtaý jáne esirtki tutynýdyń ásirese jastar arasynda onyń aldyn alýy boıynsha, jedel bólimsheler men tergeýdegi kemshilikter tikeleı kórsetildi.
Marat Seksembaev «Esirtkige qarsy is-qımyl keshendi tásildi talap etedi. Tek barlyq qurylymdardyń, ákimdiktiń jáne ýákiletti mekemelerdiń belsendiligi men kúsh-jigerin biriktirý arqyly ǵana nátıjege qol jetkizýge bolady» dep atap ótti.
Otyrysta Bas prokýratýra janyndaǵy QSjAEK Targetıng ortalyǵynyń múmkindikteri jáne óńirdegi esirtki jaǵdaıyna monıtorıng júrgizý nátıjeleri tanystyryldy.
Otyrystyń jeke blogy ınvestorlar men kásipkerlerdiń quqyqtaryn qorǵaýǵa, sondaı-aq olardy negizsiz qylmystyq qýdalaýǵa jol bermeýge arnaldy.
Oblys prokýrory memlekettik jáne quqyq qorǵaý organdarynyń basym mindeti zańdylyqty qamtamasyz etý, bıznesti qorǵaý jáne óńirde qolaıly ınvestıtsııalyq ahýal qalyptastyrý ekenin atap ótti.
Negizgi mindet retinde árbir ınvestıtsııalyq jobany qoldaý jáne «prokýrorlyq súzgi» dep atalatyn — ınvestorlardyń qyzmetine qatysty baqylaýshy memlekettik organdardyń sheshimderin qosymsha quqyqtyq baǵalaý tetigin engizý belgilendi.
Aıta keteıik, buǵan deıin ShQO-da jyl basynan beri zańsyz aınalymnan 32 keliden astam esirtki tárkilendi.