Byltyr qonys aýdarý jobasyna 200-den astam otbasy qatysty
ASTANA. KAZINFORM - 2023 jyly 214 otbasy jumys kúshi artyq óńirlerden jumys kúshi tapshy óńirlerge qonys aýdarýshylar men qandastardy jáne olardyń otbasy múshelerin beıimdeý jáne ıntegratsııalaý boıynsha qyzmetter kórsetý jónindegi pılottyq jobaǵa qatysty.
Eńbek jáne halyqty áleýmettik qorǵaý mınıstrliginiń málimetinshe, pılottyq jobaǵa Almaty, Jambyl, Jetisý, Qyzylorda, Mańǵystaý, Túrkistan oblystarynan, Astana, Almaty, Shymkent qalalarynan qonys aýdarýshylar qatysty.
Pılottyq joba qonys aýdarýshylar men qandastardyń otbasylaryn beıimdeýdiń jeke josparyn jasaý jáne qatysýshylarǵa mansap ortalyqtary qyzmetkerleriniń qatarynan jeke kómekshilerdi bekitý arqyly súıemeldeýdi kózdeıdi.
"Beıimdelýdiń jeke jospary 25 qyzmetti qamtıdy. Olardyń ishinde: qonys aýdarý óńirine kóshý jáne ornalastyrý (kelgen kúni, tasymaldaý túri, keletin otbasy músheleriniń sany); materıaldyq kómekti, onyń ishinde ekonomıkalyq mobıldilik sertıfıkatyn resimdeý; turaqty jumys ornyna jumysqa ornalastyrý, sondaı-aq qajet bolǵan jaǵdaıda kásiptik daıarlaý, qaıta daıarlaý jáne biliktiligin arttyrý; turýǵa arnalǵan turǵyn úıdi izdeý jáne irikteý ekonomıkalyq utqyrlyq sertıfıkaty arqyly tólenetin otbasylar; otbasy múshelerin beıimdeý jáne biriktirý.
Qonys aýdarýshynyń nemese qandastyń, sondaı-aq onyń otbasy músheleriniń turǵylyqty jeri ózgergennen keıin bes jyl ishinde mansap ortalyǵynyń mamandary beıimdelý men ıntegratsııa barysyna monıtorıng júrgizetin bolady. Ol úshin Otbasynyń tsıfrlyq kartasynan alynǵan derekter jáne áleýmettik ál-aýqatty qadaǵalaýǵa arnalǵan arnaıy mobıldi qosymsha paıdalanylady", - delingen vedomstvo jazbasynda.
Pılottyq jobaǵa qatysýshylardyń biri QHR-dan qonys aýdarǵan – Maına Kalımashtyń otbasy boldy. Shyǵys Qazaqstan oblysynyń eńbek mobıldiligi ortalyǵy olarǵa beıimdeý men ıntegratsııalaýdyń jeke josparyn jasady. Qandastardy qabyldaý jónindegi komıssııanyń otyrysynda Maınanyń otbasyn óńirlik kvotaǵa qosý týraly oń sheshim qabyldandy, sondaı-aq mansap ortalyǵy otbasynyń árbir múshesine 70 AEK mólsherinde kóshýge arnalǵan shyǵystardy óteý týraly sheshim qabyldady.
«Men QHR-dan erikti qonys aýdarý baǵdarlamasy boıynsha kóship keldim jáne Shyǵys Qazaqstan oblysynda qonystanýǵa sheshim qabyldadym. Óskemen qalasynyń mansap ortalyǵy qyzmetkerleriniń arqasynda bizge tıisti barlyq memlekettik qoldaý sharalaryn aldym», – dep bólisti qonys aýdarýshy.
Beıimdeý men ıntegratsııalaýdyń jeke jospary aıasynda Maınanyń otbasy Qazaqstannyń tarıhy men mádenıetimen tanysty. Maınanyń balalary Óskemen qalasynyń orta mektebinde bilim alatyn boldy. Al zań mamandyǵy boıynsha joǵary bilimi bar Maınany jumysqa ornalastyrý sharalary qaralýda.
Esterińizge sala keteıik, 2023 jyly Shyǵys Qazaqstan jáne Pavlodar oblystarynda jumys kúshi artyq óńirlerden jumys kúshi tapshy óńirlerge qonys aýdarýshylar jáne qandastar men olardyń otbasy múshelerin beıimdeý jáne ıntegratsııalaý boıynsha qyzmetter kórsetý jónindegi pılottyq joba iske qosyldy. 2024 jyly bul tetik elimizdiń basqa da eńbek kúshi tapshy óńirlerinde keńinen qoldanylatyn bolady.
