Byltyr Qazaqstanda JІÓ ósimi 6,5%-dy qurady — Úkimet

ASTANA. KAZINFORM — Ulttyq statıstıka bıýrosynyń aldyn ala derekterine sáıkes, 2025 jyldyń qańtar-jeltoqsan aılarynyń qorytyndysy boıynsha Qazaqstannyń jalpy ishki ónimi ótken jyldyń osy kezeńimen salystyrǵanda 6,5%-ǵa ósti. Bul týraly Úkimettiń baspasóz qyzmeti málim etti. 

Memleket basshysynyń tapsyrmasy boıynsha Úkimet ekonomıkany ártaraptandyrý jóninde júıeli sharalar qabyldandy. Ótken jyly ekonomıkalyq ósimge negizgi úlesti kólik, qurylys jáne saýda salalary qosty.

Úkimettiń dereginshe, ónerkásip óndirisiniń ındeksi jyl qorytyndysy boıynsha 7,4%-dy qurady. Óńdeý sektory 6,4% deńgeıinde turaqty ósimdi kórsetip otyr. Kórsetkishter azyq-túlik óndirisiniń 8,1%-ǵa, óńdelgen munaı ónimderin óńdeý 5,9%-ǵa, hımııa ónerkásibi ónimderiniń 9,8%-ǵa, metallýrgııanyń 1,2%-ǵa, mashına jasaý ónimderiniń 12,9%-ǵa ulǵaıýyna baılanysty qamtamasyz etildi.

Ósim Aqtóbe, Almaty, Atyraý, Batys Qazaqstan, Jambyl, Jetisý, Qaraǵandy, Qostanaı, Mańǵystaý, Pavlodar, Soltústik Qazaqstan, Ulytaý, Túrkistan oblystarynda, Astana, Almaty jáne Shymkent qalalarynda baıqaldy. Jyl qorytyndysy boıynsha kólik jáne qoımalaý salasyndaǵy ósim 20,4%-dy qurady (qańtar-qarashada — 20,3%).

— Bul júk tasymaly kóleminiń, eń aldymen avtomobıl jáne temirjol kóligi arqyly tasymaldaýdyń ulǵaıýyna, sondaı-aq birqatar óńirde jolaýshylar tasymalynyń artýyna baılanysty boldy. Qosymsha kólik qyzmetteriniń, onyń ishinde júkterdi ekspedıtsııalaý, áýe qozǵalysyn basqarý qyzmetteriniń, áýejaılardyń, qoımalar men pakgaýzdardyń qyzmetteriniń, astyq saqtaý qyzmetteriniń jáne salqyndatylǵan júkterdiń kóleminiń artýy baıqalady, — delingen habarlamada.

Qurylys salasynda ósim 15,9%-dy qurady, bul 2025 jylǵy qańtar–qarasha (14,7%) kórsetkishinen joǵary. Ósim jaıly mektepter, medıtsınalyq nysandar, kólik jáne ınjenerlik ınfraqurylymdar salýdy qosa alǵanda, ınfraqurylymdyq jáne áleýmettik jobalardy júzege asyrýmen qamtamasyz etilgen.

2025 jylǵy qańtar-jeltoqsanda paıdalanýǵa berilgen turǵyn úıdiń jalpy aýdany 20,1 mln sharshy metrdi qurady, bul 2024 jylǵy deńgeıden 5,1%-ǵa joǵary.

— Saýda salasynda da oń serpin saqtaldy: 2025 jyldyń qańtar–jeltoqsan aılarynda ósim 8,9%-dy qurady (qańtar-qarashada — 8,8%). Negizgi úles jalpy kólemniń úshten ekisinen astamyn quraǵan kóterme saýdaǵa tıesili boldy. Kóterme saýda kóleminiń ósý qarqynyna astyq, tuqym jáne mal azyǵyn satatyn kásiporyndar — 2,6 ese, mashınalar men jabdyqtar — 99,8%, farmatsevtıkalyq taýarlar — 44,1%, avtomobılder men jeńil avtokólik quraldary — 33%, sút ónimderi, jumyrtqa men maılar — 25,8%, qant, shokolad jáne qantty kondıterlik ónimder — 21,2%, keń assortımenttegi taýarlar — 12,5% áser etti, — dep habarlady Úkimetten.

Aýyl, orman jáne balyq sharýashylyǵyndaǵy kórsetkishter 5,9% qurady. Ósim ósimdik sharýashylyǵynda (7,8%) jáne mal sharýashylyǵynda (3,3%) oń dınamıka qamtamasyz etilgen. Aqparat jáne baılanys salasynda ósim 3,6%-dy qurady. Jalpy alǵanda, 2025 jyldyń qorytyndysy boıynsha ekonomıkanyń jıyntyq ósimi negizgi salalardyń turaqty damýyn kórsetti. 

Aıta keteıik, buǵan deıin jalpy ishki ónimniń 3 jyldaǵy ortasha ósimi 5,3 paıyzǵa teń ekenin jazǵan edik.