Byltyr bıýdjet kiristeri boıynsha túsimder nege tómendedi

ASTANA. KAZINFORM – Byltyr respýblıkalyq bıýdjettiń kiristeri jyldyq jospardan 97,2 paıyzǵa oryndaldy. Bul týraly Májilistiń jalpy otyrysynda 2024 jylǵy respýblıkalyq bıýdjettiń atqarylýy týraly Úkimet esebin talqylaý kezinde QR Qarjy mınıstri Mádı Takıev aıtty.

— Respýblıkalyq bıýdjettiń kiristeri jyldyq jospardan 97,2 paıyzǵa oryndalyp, bıýdjetke 19,6 trln teńge tústi. Onyń ishinde, respýblıkalyq bıýdjettiń menshikti kiristeri (transfertterdi esepke almaǵanda) 13,5 trln teńgeni qurady, — dedi M. Takıev.

Jospar 608,6 mlrd teńgege oryndalmady. Kirister boıynsha túsimderdiń tómendeýine kelesi faktorlar áser etti:

— birinshiden, álemdik geosaıası jaǵdaıǵa baılanysty keıbir óndiris kóleminiń qysqarýy men logıstıkalyq shyǵyndardyń ósýine baılanysty 188 iri kásiporyn boıynsha túsimder 1,4 trln teńgege azaıdy;

— ekinshiden, bıýdjet esebinen 1 trln 216 mlrd teńge somasynda qosylǵan qun salyǵyn rekordty mólsherde qaıtarý oryn aldy, bul 2023 jylmen salystyrǵanda 3 ese kóp.

— úshinshiden, esepti jyly negizgi eksporttyq metaldar baǵasynyń qubylmalyǵy saqtaldy. Mysaly, myrysh baǵasy 22%-ǵa, alıýmınıı 8%-ǵa tómendedi;

— tórtinshiden, úshinshi elderden keletin ımport kólemi 2 mlrd AQSh dollaryna azaıdy.

— Sonymen qatar, 2024 jyly ekonomıkadaǵy kóleńkeli aınalymdy qysqartý, onyń ishinde fıskaldyq ákimshilendirýdi tsıfrlandyrý jumystary jalǵasty, osy arqyly bıýdjetke qosymsha 1 trln 280 mlrd teńge tústi. 2023 jylmen salystyrǵanda 349 mlrd teńgege nemese 37% kóbeıdi. Mysaly, shamamen 377 mlrd teńge tekserý aktileri boıynsha salyqtar qosa eseptelip, kameraldyq baqylaý qorytyndysy boıynsha bıýdjetke 262 mlrd teńge óndirip alyndy, — dedi mınıstr.

Buǵan deıin Qarjy mınıstri 2024 jyly áleýmettik mindettemelerdi Úkimet tolyqtaı oryndaǵanyn málim etti.