Byltyr ata-ana mindetin oryndamaǵan 29 myń zańdy ókil jaýapqa tartyldy

ASTANA. KAZINFORM — Ótken jyly túngi ýaqytta kóshede qaraýsyz júrgen 130 myń bala anyqtaldy. Bul týraly búgin Úkimet otyrysynda Іshki ister mınıstri Erjan Sádenov aıtty.

- Bıyl Іshki ister mınıstrliginiń organdarynda «Zań men tártip - qaýipsiz balalyq shaqtyń kepili» taqyryby aıasynda ótedi. Arnaıy vedomstvolyq jospar ázirlendi. Negizgi nazar balalardyń quqyqtaryn qorǵaý jáne olardyń qaýipsizdigin qamtamasyz etýge aýdarylady. Osy salada zańnama damyp keledi. Balalarǵa qatigezdikpen qaraǵany úshin jaýapkershilik kúsheıtildi.

Profılaktıka týraly jańa zań aıasynda balalardyń quqyqtaryn qorǵaý boıynsha aımaqtyq ókiletti organdar qurylýda. Zorlyq-zombylyq, býllıngke ushyraǵan balalarǵa áleýmettik jáne psıhologııalyq kómek, tálimgerlik, otbasylyq keńes berý qarastyrylǵan. Sonymen qatar keshendi is-sharalar, onyń ishinde jedel profılaktıkalyq jumystar ótkizý kózdelgen, - dedi mınıstr. 

Onyń dereginshe, ótken jyly túngi ýaqytta kóshede qaraýsyz júrgen 130 myń bala, oıyn-saýyq oryndarynda 2 600 bala anyqtalǵan. Ata-ana mindetin oryndamaǵan 29 myń zańdy ókil jaýapqa tartylǵan. 

- Balalardyń jol-kólik jaraqatyn aldyn alý jumys kúsheıtildi. Balalardy tasymaldaý erejelerin buzǵany úshin 17 myń júrgizýshi jaýapkershilikke tartyldy. Mektepterdiń qasyndaǵy ınfraqurylymdy tekserdik. Qosymsha jaıaý júrginshi baǵdarshamdary, jasandy kedergiler, jol belgileri men aqparattyq panolar, qorshaýlar, jaryqtandyrýlar ornatyldy, - dedi Erjan Sádenov. 

Aıta keteıik, Úkimet otyrysynda Oqý-aǵartý mınıstri Juldyz Súleımenova «Qazaqstan balalary» tujyrymdamasyn tanystyrǵan edi.