Byltyr astanalyqtardan CTS qyzmetimen baılanysty 55 myń shaǵym túsken
ASTANA. KAZINFORM – Byltyr iKomek ortalyǵyna CTS qyzmetimen baılanysty 55 myń shaǵym túsken. City Transportation Systems kompanııasynyń basqarma tóraǵasynyń mindetin atqarýshy Abat Shynybekov Astana qalasynyń máslıhat otyrysynda aıtty.
«Búgingi tańda qalada qoǵamdyq kólikke degen suranys joǵary. Sońǵy málimetter boıynsha, turǵyndardyń 48 paıyzy qoǵamdyq kólikti kúndelikti paıdalanady. Qala boıynsha 96 marshrýtta 1 367 avtobýs qyzmet kórsetedi. Kún saıyn qoǵamdyq kólik arqyly 600 myńdaı jolaýshy tasymaldanýda. Kestedegi avtobýstardyń júrý ýaqytyn qysqartýǵa baılanysty qala boıynsha 100,5 shaqyrym arnaıy Bass-Line túzilgen. Jelidegi avtobýstarda 1 800-ge jýyq júrgizýshi jumys isteıdi. Jolaýshylar úshin qala boıynsha 1 400 aıaldama jasaqtalǵan. Bizdiń jumystaǵy basty nazar jolaýshylardyń oryndy suranystaryn eskere otyryp, salany belsendi damytýǵa aýdarylady», - dedi ol.
Kompanııa basshysy aı saıyn iKomek ortalǵyna avtobýs qatynasyna baılanysty 6 myńnan astam ótinish pen shaǵym túsetinin aıtty.
«Qoǵamdyq kóliktiń jumysy týraly turǵyndar tarapynan túsetin ótinishter men shaǵymdardy kúndelikti baqylap otyrmyz. Ol úshin bizdiń tıisti qyzmetterimiz birneshe aqparat kózderi, eseptik kezdesýlerde kóterilgen máseleler, keri baılanys tásilderin únemi paıdalanyp keledi. Ásirese turǵyn úı alaptary, shaǵyn aýdandar men qala mańyndaǵy eldi mekenderdiń belsendi turǵyndarymen ár túrli baılanys júıesi jolǵa qoıylǵan.
iKomek ortalyǵy jolaýshylar tasymaly qyzmetiniń sapasyn qadaǵalaıdy. Aı saıyn ortalyqqa qoǵamdyq kólikpen baılanysty 6 myńnan astam ótinish túsedi. Onyń negizgi bóligi avtobýstardyń júrý kestesin saqtamaýy týraly – 51 paıyz. Sondaı-aq avtobýs marshrýttarynyń júrý syzbasyn ózgertý, qoǵamdyq kóliktegi jumysty jaqsartý týraly shaǵymdar túsedi – 12 paıyz. Qyzmetkerlerimizdiń nemese júrgizýshilerdiń áreketine qatysty shaǵym-ótinishter 6,5 paıyzdy quraıdy.
Jalpy 2023 jyly iKomek ortalyǵyna qoǵamdyq kólikpen baılanysty 55 myńnan astam ótinish kelip tústi. Osy túsken barlyq ótinishter men shaǵymdarǵa taldaý jasalady», - dedi Abat Shynybekov.
