Bilim salasynda tyń betburys jasaýdyń ýaqyty keldi – pedagog
Onyń aıtýynsha, Memleket basshysynyń qatysýymen ótken Ulttyq qoǵamdyq senim keńesiniń úshinshi otyrysynda bilim salasyna qatysty ótkir de mańyzdy máseleler ashyq aıtylyp, onyń sheshilý joldary usynyldy.
Eń aldymen Prezıdenttiń bilim berýdi «ekonomıkanyń eń mańyzdy salasy» dep anyqtaýy bilim berý salasyna degen buǵan deıin qalyptasyp kelgen kózqarastyń túbegeıli ózgerýin kórsetedi. Bul aldyńǵy qatarly damyǵan elderdiń «tabysty bolýynyń negizi – bilim salasyn ekonomıkamen tikeleı baılanystyrý» úrdisimen úndesedi. Bilim men aqparatqa bet alǵan qoǵamda bilim berý júıesi ınnovatsııalyq ekonomıkanyń negizgi bóligi bolyp tabylady. Aqparattyq úderispen birge órlep kele jatqan jańa bilimdilikke suranys ekonomıkalyq damýdyń jańa faktory retinde qalyptasýda.
Bilim sapasy turǵysynan qala men aýyl mektepteriniń arasynda alshaqtyqty boldyrmaý kerek, áleýmettik jaǵdaılaryna, turǵylyqty jerine qaramastan beriletin bilim sapaly bolýy tıis delindi. Prezıdent kótergen shaǵyn jınaqty mektepterdi kásibı mamandarmen qamtamasyz etý pedagog kadrlar daıarlaıtyn oqý oryndaryna da mindetter júkteıdi. Bul bir jaqty sheshiletin másele emes, atap aıtqanda, birneshe mamandyq alýǵa múmkindik beretin baǵdarlamalar daıyndaý, mamandyqtar jikteýishine ózgerister endirýdi, pedagog kadrlar daıarlaýdyń jańa formatyn jasaýdy da qamtıdy. Bulardyń búginde qolǵa alynyp jatqany týraly mınıstr Ashat Aımaǵambetov óz baıandamasynda aıtyp ótti.
«Jaǵymdy jańalyq retinde pedagog kadrlardy daıarlaýdyń jańa joly burynnan pedagogtyq bilimi joq basqa sala mamandaryna pedagogıkalyq bilim berýdi qarastyrýdy aıtar edik. Bul shetel oqý oryndarynda qalyptasqan úrdis. Mysaly, biz Kembrıdj ýnıversıtetiniń bilim baǵdarlamalarymen tanysqan kezde kez kelgen adam áýeli tehnıkalyq nemese jaratylystaný baǵyttary boıynsha dıplom alyp, keıin óz qalaýymen pedagogıkalyq-psıhologııalyq, ádistemelik daıyndyqtan ótken soń muǵalim bola alatynyn kórdik. Bul tájirıbe Evropa elderinde keńinen taralǵan. Bizdiń jaǵdaıymyzda bul kezinde belgili bir mamandyq boıynsha dıplom alyp, túrli sebeptermen jumyssyz otyrǵan joǵary, orta bilimdi mamandardy qosymsha oqytý shaǵyn jınaqty mektepterdiń maman jetispeýshilik máselesin sheshýdiń bir joly bolar edi», deıdi pedagog.
Prezıdenttiń bilim berýdi, sonyń ishinde, pedagogıkalyq mamandyqtardyń baǵdarlamalaryn modernızatsııalaýda IT-quzyrettilikke, jańa tehnologııalar men arnaıy modýlder endirý týraly aıtqandary da asa mańyzdy. J.Dosmuhamedov atyndaǵy pedagogıkalyq kolledjde «Nazarbaev zııatkerlik mektepteri» DBBU-men birlesip jasaǵan «Bastaýysh bilim berý» mamandyǵy boıynsha jańa bilim baǵdarlamasynda atalǵan arnaıy modýlder endirilip, «Aqparattyq quzirettilik», «Robottyq tehnıka», «Jobalaý negizderi» «Emotsııalyq ıntellekt», t.b. jańa pánder engizilip otyr. Sonymen qatar bilim berý uıymdaryna «Kásibı standarttar» negizinde pánderdi tańdaý múmkindigin berýdi akademııalyq erkindiktiń bastamasy dep baǵalaýǵa bolady.
Memleket basshysy sondaı-aq qashyqtan oqytý tásili jahandyq úrdis retinde qalyptasqanyn, álemniń kóptegen oqý oryndary bul ádisti keńinen qoldanatynyn jáne aldaǵy ýaqytta ony jetildirý qajettigin basa aıtty. Pedagog mamandardyń bul pikirdi qýattaıtyny anyq. Basqalar sııaqty, BQO-nyń barlyq oqý oryndarynda osy úrdiske qıyndyq retinde emes, jańa múmkindikter men jańa resýrstardy damytý joly dep qarastyryp, biraz nátıjelerge qol jetkizildi. Shyn máninde qashyqtan oqytý stýdentterdiń ózdiginen bilim alýy men óz bilimine jaýapkershiligin kúsheıtse, pedagogtardyń tsıfrlyq saýattylyǵyn jetildirýge sebep boldy.
«Alaıda, búgingi kúni bul tehnologııanyń stýdentpen keri baılanys jasaý, ınteraktıvtik jumys ádisterin, emtıhan alýdyń testten basqa túrlerin qarastyrý turǵysynan jetildirý qajettigin kórdik. Jalpy alǵanda, qashyqtan oqytý pedagog mamandardy syrttaı oqytý sııaqty formaldy túrinen únemi tikeleı baılanysta jumys jasaýǵa múmkindik beretin, kadrlardy sapaly daıarlaıtyn, sybaılas jemqorlyqty boldyrmaıtyn tıimdi oqý túri ekenine kózimiz jetýde. Endigi kezektegi jumystar – onyń ádisnamasyn jasaý, ádistemesin jańartý, resýrstardy jetildirý», deıdi kolledj dırektory.
Ulttyq keńes otyrysynda sonymen qatar Asylbek Qojahmetovtiń, Murat Ábenovtiń, Raýan Kenjehanulynyń, Saıasat Nurbektiń bilim salasyn jańartý týraly tujyrymdy oılary nazar aýdararlyq boldy. Mınıstr Ashat Aımaǵambetovtiń baıandamasyndaǵy osy salany damytýdaǵy irgeli oılary kordalanǵan kóp máselelerdiń sheshimi tabylatynyna senim uıalatady.
«Budan basqa da Ulttyq keńes otyrysynda aıtylǵan bilim salasynyń árbir satysyn jańartý joldary, ǵylymı kadrlardy daıarlaý, taǵylymdamaǵa joldaý, ǵylymı jobalar konkýrstaryn jyl saıyn júrgizý, doktoranttardyń, pedagogıkalyq mamandyq stýdentteriniń stıpendııasyn arttyrý, oqytýshylardyń jalaqysyn kóterý, muǵalimder úshin arnaıy medal bekitý sııaqty kóptegen jaǵymdy jańalyqtar pedagog mártebesin kóterý tek zań qabyldaýmen ǵana shektelmeı, Prezıdenttiń únemi nazarynda ekenin kórsetedi. Jalpy, Ulttyq keńeste bilim men medıtsına salasynda batyl da oń betburysqa jeteleıtin tyń baǵyttar aıtyldy. Endi munyń oryndalýy da elimiz úshin asa mańyzdy bolmaq», dep túıindedi oıyn S.Bahısheva.
