Bilim salasynda qaı óńirlerde jemqorlyq faktileri kóp

ASTANA. QazAqparat – Sońǵy úsh jylda mektepke deıingi, orta jáne arnaıy bilim berý salasynda 300-den astam jemqorlyq faktisi boldy, dep habarlaıdy QazAqparat.

Osyǵan baılanysty Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı men Oqý-aǵartý mınıstri Ǵanı Beısembaev orta bilim berýdi qarjylandyrýdaǵy sybaılas jemqorlyq qaterlerine birlesken taldaý júrgizýge ýaǵdalasyp otyr. Mundaı sheshim jemqorlyqqa qarsy agenttik pen Oqý-aǵartý mınıstrliginiń otyrysynda qabyldandy.

Málim etilgendeı, sońǵy 3 jylda bul salada 300-den astam sybaılas jemqorlyq quqyqbuzýshylyǵy tirkeldi jáne 200-ge jýyq adam áshkerelendi.

«Mundaı qylmystar respýblıkanyń barlyq óńirlerine tán, ásirese eń kóp kórsetkish Shymkent qalasyna, Shyǵys Qazaqstan, Túrkistan jáne Qyzylorda oblystaryna tıesili. Qyzylorda, Aqtóbe oblystary men Taldyqorǵan qalasynyń bilim berý qyzmetkerlerine qatysty sońǵy atyshýly ister eleýli sybaılas jemqorlyq shemalarynyń bar ekendigin rastaıdy», - dedi Ashat Jumaǵalı birlesken otyrysta.

Aldyn ala zertteý barysynda qarajatty urlaýǵa daıyndyq bıýdjettik ótinimderdi qalyptastyrý satysynda júretini anyqtaldy. Bul rette mektepterdiń, bilim bólimderiniń jaýapty qyzmetkerleri jáne basqa da adamdar sóz baılasady. Qarjylandyrýdan keıin qarajat qalalyq, aýdandyq bilim bólimderine bólinedi, al únemdelgen soma eńbekaqy tóleý qoryna aýdarylady.

Tergeý nusqasy boıynsha, mundaı tájirıbe Taldyqorǵan qalasynyń bilim bóliminiń bas býhgalterine esepte joq adamdarǵa jáne úlestes tulǵalarǵa qarjy aýdarý arqyly shamamen 2 mlrd teńge urlaýǵa múmkindik berdi.

«Áli aýdıtorlyq tekserý júrgizilýde, soma naqtylanady. Alaıda tintý barysynda kúdiktiden 1 mlrd teńge aqshalaı qarajat tabyldy jáne tárkilendi, onyń edáýir bóligi shetel valıýtasynda boldy. Mundaı quqyqbuzýshylyqtar bıýdjettik ótinimderdi qalyptastyrý tetikteriniń jetilmegeni, bilim berý qyzmetkerlerin ortalyqtandyrylǵan esepke alýdyń bolmaýy jáne osy protsesterdi tsıfrlandyrýdyń jetkiliksizdigi saldarynan boldy», - dep atap ótti Ashat Jumaǵalı.

Keńes qorytyndysy boıynsha taraptar bilim berý salasyndaǵy jaǵdaıdy ózgertý boıynsha keshendi sharalardy belgiledi.

Eske salaıyq, ústimizdegi sáýir aıynda Antıkor Taldyqorǵannyń bilim bólimi qyzmetkerleriniń sómke-sómke aqshamen ustalǵan vıdeony jarııalaǵan bolatyn.