Bilim grantyn bólý mehanızmi mekteptegi kásiptik baǵdarlaýmen sáıkestendiriledi

NUR-SULTAN. QazAqparat – Aldaǵy ýaqytta memlekettik bilim granttaryn bólý mehanızmi mekteptegi kásiptik baǵyttaý jumystarymen sáıkestendiriledi. Bul týraly Ǵylym jáne joǵary bilim mınıstri Saıasat Nurbek málimdedi, dep habarlaıdy QazAqparat tilshisi.

«Grant bólý mehanızmi endi kásiptik baǵyttaý jumysymen ushtastyrylady. ıAǵnı, 7-synyptan bastap ár óńirdiń mektepterinde kásipttik baǵyttaý boıynsha jumys isteıtin pedagogter engizilip jatyr. Qazir pılottyq negizde Túrkistan oblysynda 800 kásiptik baǵyttaýshy daıyndaldy. Onyń arnaıy baǵdarlamasy da ázirlendi. Bul joba aldaǵy ýaqytta elimizdegi barlyq 7,5 myń mektepte engiziledi. Osyǵan oraı, balaǵa aldyn ala eńbek naryǵy jáne jańa mamandyqtar týraly aqparat beriletin bolady», - dedi Ǵylym jáne joǵary bilim mınıstri.

Sonymen qatar Saıasat Nurbek endi joǵary oqý oryndary men kásiptik bilim beretin uıymdar jańa oqý baǵdarlamasyn boljamsyz jasaı almaıtynyn aıtty. Onyń dereginshe, bilim ordalary eńbek naryǵyndaǵy maman tapshylyǵy máselesin eskerýi tıis.