Bilim berý uıymdaryndaǵy býllıng derekteri eleýsiz qalyp otyr
«Tájirıbe kórsetip otyrǵandaı, bilim berý uıymdaryndaǵy býllıng derekteri eshqaıda tirkelmeıdi jáne eleýsiz qalady. Qatigezdiktiń erekshe túrli qoldanylyp, qoǵamda ashý-yza týǵyzǵan, keńinen jarııa bolǵan jekelegen jaǵdaılar bar. Biraq, ádette oqý ornynyń ákimshiligi býllıngti tyıý jáne odan ary boldyrmaý úshin tıisti is-sharalar qabyldamaıdy. Pedagogtar býllıngke ushyraǵan balalarmen oryn alǵan jaıtty talqylaýǵa, janjaldasýshy taraptardy tatýlastyrýǵa tyrysady. Jábirleýshige tártiptik is-shara qoldanylyp, zardap shegýshini áleýmettik pedagogke nemese psıhologqa jiberedi. Bul rette basshy da, oqytýshy da, psıholog ta barlyq ýaqytta býllınge ushyraǵandarǵa tıimdi kómek kórsetýge daǵdylanbaǵan», - dedi Bıbigúl Asylova Ortalyq kommýnıkatsııalar qyzmetindegi baspasóz máslıhaty barysynda.
Onyń aıtýynsha, problemanyń aýqymdy ári kúrdeli ekendigine qaramastan bilim berý júıesinde býllıngtiń aldyn alýǵa jáne ony joıýǵa úlken múmkindik bar.
«Kóptegen eldiń tájirıbesi bilim berý uıymdaryndaǵy býllıngke tıimdi qarsy turýǵa bilim berý protsesiniń barlyq qatysýshylaryna keshendi ári júıeli áser etýge baǵyttalǵan normatıvtik aktilerdi ázirleý jáne qabyldaý septigin tıgizetindigin kórsetip otyr. Alaıda, qoldanystaǵy zańnamada býllıng túsinigi qarastyrylmaǵan. Osyǵan baılanysty Bilim mınıstrligi balalar quqyǵyn qorǵaý salasyndaǵy ókiletti organ retinde Parlament depýtattarynyń býllıng termınologııasyn aıqyndaıtyn jáne BǴM-nyń bilim protsesindegi býllıngtiń aldyn alý jónindegi normatıvtik-quqyqtyq aktilerdi ázirleýdegi quzyretin keńeıtý jónindegi zańnamalyq bastamalaryn qoldaıdy», - dedi Bıbigúl Asylova.
