Bılik bar aqparatty ashyq, búkpesiz ári dereý jarııalap otyr - Erlan Qarın
«Jambyl oblysy Qordaı aýdanyńda bolǵan jaǵdaılarǵa bárimiz de alańdap otyrmyz. Jaǵdaıdyń ońaı emes ekenin moıyndaýǵa týra kelip tur. Eń aldymen, oqıǵa saldarynan qaza tapqan azamattardyń týystary men jaqyndaryna qaıǵylaryna ortaqtasyp kóńil aıtamyn. Bir memlekettiń azamattary beıbit kúnde qurban bolýy bárimizdiń de júregimizge aýyryp tıip otyr. Ózderińizge belgili, memleket basshysy Qasym-Jomart Toqaev oqıǵalar oryn alǵan sátten bastap birden jaǵdaıdy tikeleı óz baqylaýyna alyp, quzyrly organdarǵa tıisti tapsyrmalardy berdi. Qazirgi ýaqytta memleket basshysynyń tapsyrmasymen shuǵyl qurylǵan Úkimettik komıssııa oqıǵa ornynda óz jumysyn bastap ketti. Bılik organdary bar aqparatty ashyq, búkpesiz ári dereý jarııalaýda, memlekettik aqparat quraldary da eldi barynsha jedel, naqty jáne shynaıy aqparattarmen qamtamasyz etýde», - dep jazdy Erlan Qarın áleýmettik jelide.
Onyń sózinshe, jelide azamattar negizinen oqıǵa saldaryn anyqtaý barysynda qanshalyqty ádiletti baǵa beriledi dep suraq qoıýda. Degenmen, kináliler tıisti jazasyn alady. Buǵan eshkimniń de kúmáni bolmaýy tıis.
«Zań bárine birdeı. Qazir, eń bastysy bul tragedııa basqa da jaǵdaılarǵa ulasyp ketpeýi tıis. Daý shyǵaryp, qan tógýmen eshqashan da, eshqandaı da másele sheshilmegen, sheshilmeıdi de. Bul jaǵdaı eldigimizge de, memlekettiligimizge de úlken syn. Sondyqtan, resmı aqparatqa júginip, úkimettik komıssııanyń jumysynyń nátıjelerin kúteıik», - deıdi Prezıdent kómekshisi.
