Bıylǵy jeti aıda Qazaqstan men Germanııa arasyndaǵy saýda-sattyq kólemi 2,3 mıllıard dollardan asty

ASTANA. KAZINFORM - Qasym-Jomart Toqaev pen Olaf Sholts resmı delegatsııa músheleriniń qatysýymen keńeıtilgen quramda kelissóz ótkizdi, dep habarlaıdy Aqordanyń baspasóz qyzmeti.

Prezıdent Kantslerdiń elimizge jasaǵan alǵashqy resmı saparynyń máni zor ekenin atap ótip, búgingi kezdesý Qazaqstan men Germanııanyń kópqyrly yntymaqtastyǵyn jańa deńgeıge kóteretinine senim bildirdi.

– Biz jańa ǵana shaǵyn quramda ekijaqty qarym-qatynasty odan ári nyǵaıtý máselesin talqyladyq. Saýda-ekonomıka, ınvestıtsııa salalaryndaǵy yqpaldastyqty tereńdetýge erekshe nazar aýdaryldy. Budan bólek, ózekti halyqaralyq máseleler týraly sóz qozǵadyq. Atap aıtqanda, qazirgi geosaıası ahýalǵa, jahandyq qaýipsizdikke jáne aımaqtyq damýǵa, klımattyń ózgerýine qatysty pikir almastyq. Sondaı-aq halyqaralyq uıymdar aıasyndaǵy yqpaldastyq máselesin qarastyrdyq. Ekijaqty qarym-qatynastar strategııalyq seriktestik rýhynda damyp keledi. Búgingi kelissózder onyń aıasyn keńeıte túsýge yqpal etetinine senimdimin, – dedi Qasym-Jomart Toqaev.

Memleket basshysynyń aıtýynsha, Germanııa Qazaqstannyń negizgi saýda seriktesteriniń biri jáne ekonomıkamyzǵa ınvestıtsııa salǵan jetekshi elderdiń sanatyna kiredi.

– Byltyr ekijaqty taýar aınalymy 1,5 esedeı ósip, 4 mıllıard dollarǵa jýyqtady. Bıyl da oń dınamıka baıqalyp otyr. Sońǵy jeti aıda ózara saýda-sattyq kólemi 2,3 mıllıard dollardan asty. 2005 jyldan beri Germanııadan shamamen 6,7 mıllıard dollar kóleminde tikeleı ınvestıtsııa tartyldy. Bul qarjynyń 90 paıyzy shıkizattyq emes sektorǵa tıesili ekeni qýantady. Búginde Qazaqstanda nemis kapıtalynyń úlesi bar myńnan astam kompanııa jumys isteıdi,– dedi Prezıdent.

Germanııanyń Federaldyq kantsleri qazaq jerinde kórsetilgen syı-qurmet úshin Qasym-Jomart Toqaevqa alǵys aıtyp, ekijaqty baılanystardyń qarqyndy damyp kele jatqanyna toqtaldy.

– Sizdiń elińizge tikeleı ınvestıtsııa salý jáne saýda aınalymynyń kólemin arttyrý úshin ekonomıkalyq baılanystarymyzdy jaqsartýǵa barlyq jaǵdaıdy jasaımyz. Árıne, ekonomıkalyq yntymaqtastyqty barlyq salada damytqymyz keledi. Energetıka salasyndaǵy seriktestigimiz dáıekti túrde alǵa jyljyp kele jatqanyna dán rızamyz. Eki el arasynda senimdi ári júıeli yntymaqtastyq ornaǵan. Bul – búkil álemge jaqsy úlgi. Sondaı-aq bizdiń aldymyzda turǵan halyqaralyq syn-qaterler tóńireginde jan-jaqty pikir almasqanymyzǵa qýanyshtymyz, – dedi Olaf Sholts.

Taraptar ózara tıimdi saýda-ekonomıkalyq yntymaqtastyqty arttyrýǵa, ásirese, energetıka, «jasyl» transformatsııa, taý-ken ónerkásibi, kólik-logıstıka, klımatty qorǵaý, ekologııa jáne aýyl sharýashylyǵy salalaryndaǵy yqpaldastyqty kúsheıtýge múddeli ekenin rastady.

Sondaı-aq qazaq-german mádenı-gýmanıtarlyq baılanystaryn nyǵaıtý perspektıvasy qarastyryldy.

Osyǵan deıin Germanııa kantsleri Germanııa men Qazaqstannyń energetıkalyq yqpaldastyǵy jaqsy ilgerilep kele jatqandyǵyn jetkizdi.