Bıyldan bastap kimderdiń zeınetaqysy 5 paıyzǵa ósedi
ASTANA.KAZINFORM — 1 qańtardan bastap Biryńǵaı jınaqtaýshy zeınetaqy qorynan tólenetin zeınetaqy tólemderi zeınetaqy tólemderin burynnan alyp júrgen zeınetkerler úshin 5 paıyzǵa ulǵaıady.
Esterińizge sala keteıik, BJZQ-dan beriletin zeınetaqy tólemderiniń mólsherin esepteý Qazaqstan Respýblıkasy Úkimetiniń 2023 jylǵy 30 maýsymdaǵy qaýlysymen bekitilgen Zeınetaqy tólemderiniń mólsherin esepteý ádistemesine sáıkes júzege asyrylady.
Atalǵan ádistemege sáıkes, zeınetaqy tólemderin alǵash ret ala bastaıtyn azamattar úshin aı saıynǵy tólem mynadaı tártippen esepteledi: zeınetaqy jınaqtarynyń somasy zeınetaqy jınaqtaryn tóleý mólsherlemesi — 6,5 paıyzǵa kóbeıtilip, 12 aıǵa bólinedi.
Keıingi jyldary aı saıynǵy tólem mólsheri zeınetaqy tólemderin ındeksteý mólsherlemesine sáıkes 5 paıyzǵa arttyrylady.
BJZQ-dan júzege asyrylatyn aı saıynǵy zeınetaqy tóleminiń eń tómengi mólsheri respýblıkalyq bıýdjet týraly zańmen tıisti qarjy jylyna belgilengen eń tómengi kúnkóris deńgeıiniń (ETK) keminde 70 paıyzyna teń. 2026 jylǵy eń tómengi kúnkóris deńgeıi - 50 851 teńge. Al aı saıynǵy zeınetaqy tóleminiń eń joǵary mólsheri shektelmeıdi jáne ol alýshynyń zeınetaqy jınaqtarynyń kólemine tikeleı baılanysty.
Ádistemede tómende kórsetilgen sanattarǵa jatatyn azamattar úshin zeınetaqy tólemderiniń mólsherin esepteý kezinde qoldanýǵa bolatyn arttyrýshy túzetý koeffıtsıentteri kózdelgen:
• merzimsiz ýaqytqa belgilengen I nemese II toptaǵy múgedektigi bar adamdar;
• mindetti kásiptik zeınetaqy jarnalary jıyntyǵynda keminde 60 aı tólengen jáne zeınetkerlik jasqa jetken adamdar. Eger azamat joǵaryda kórsetilgen eki talapqa birdeı sáıkes kelse, eń joǵary mánge ıe túzetý koeffıtsıenti qoldanylady.
Osylaısha, zeınetaqy tólemderiniń mólsheri turaqty túrde aýdarylatyn zeınetaqy jarnalary men jınaqtalǵan ınvestıtsııalyq kiris esebinen qalyptasatyn zeınetaqy jınaqtarynyń kólemine tikeleı táýeldi. BJZQ-dan beriletin tólemder jeke zeınetaqy shotyndaǵy qarajat tolyq taýsylǵanǵa deıin júzege asyrylady. Jeke zeınetaqy jınaqtary salymshynyń menshigi bolyp tabylatyndyqtan, olar azamattyq zańnamada belgilengen tártippen muraǵa qaldyrylady.
Aıta ketelik elde zeınetaqy men járdemaqy kóbeıetinin jazǵan edik.