Bıyl Jaıyq ózeni qaýipti deńgeıge kóterilýi múmkin – BQO ákimi
ORAL. KAZINFORM - Batys Qazaqstan oblysynda bıyl Jaıyq ózeni qaýipti deńgeıge kóterilýi múmkin. Bul týraly BAQ ókilderine arnalǵan baspasóz máslıhatynda oblys ákimi Narıman Tóreǵalıev aıtty.
Onyń sózine qaraǵanda, óńirde qardyń kóp túsýi jáne kúzde ylǵaldyń mol bolýy kóktemgi sý tasqynyna yqpal etýi yqtımal.
«Qazirgi kezde tońnyń qalyńdyǵy 30-50 santımetr aralyǵynda. Oǵan jer betindegi muzdyń jamylǵysy qosylsa, qar sýy saı-salany qýalap ketýi múmkin. Ásirese, bıyl Jaıyq ózeni erekshe nazarda bolýy kerek. Óıtkeni Reseıdegi áriptesterimizden alynǵan aqparatqa sáıkes ol jaqta da qar qalyń. Sondyqtan qar kúrt erip, sý tez kelse, oblysta 1994 jylǵy jaǵdaı qaıtalanýy múmkin. Onda Jaıyq deńgeıi 8 metr 30 santımetrge jetken bolatyn. 6 metrden asqan jaǵdaıda saıajaıalar sýǵa ketedi. Sondyqtan osyndaı máseleler qaterge alynyp, barlyq daıyndyq jumystary júrgizildi. Áli de pysyqtalady», - dedi óńir basshysy.
Eske sala keteıik, budan buryn BQO-da sý basý qaýpi bar 147 eldi meken baqylaýǵa alynǵanyn jazǵan bolatynbyz.
