Bıyl Ulytaý oblysy aýmaǵynda mal urlyǵy 30%-ǵa tómendegen

ASTANA. KAZINFORM — Bıyl óńirde iri kólemdegi mal urlyǵyna qatysy bar uıymdasqan qylmystyq top sottaldy, dep habarlaıdy Ulytaý oblysy prokýratýrasynyń baspasóz qyzmeti.

Vedomstvo quqyq qorǵaý organdarymen birlese otyryp, mal urlyǵyna qarsy júıeli sharalar qabyldap jatyr. Osy baǵyttaǵy jumystyń tıimdiligin arttyrý maqsatynda oblys prokýratýrasy barlyq múddeli organdardyń qyzmetin úılestirýge baǵyttalǵan mal urlyǵyna qarsy jol kartasyn iske asyryp keledi.

— Jol kartasyn júzege asyrý aıasynda polıtsııa qyzmetkerleri uıymdasqan qylmystyq topty áshkerelep, olardyń iri kólemdegi mal urlyǵyna qatystylyǵyn anyqtady. Sotqa deıingi tergep-tekserý barysynda olardyń kinási tolyq dáleldenip, sot úkimimen atalǵan tulǵalar sottaldy. Qabyldanǵan birlesken sharalardyń nátıjesinde bıyl oblys aýmaǵynda mal urlyǵy 30%-ǵa tómendegeni baıqalady, — delingen prokýratýra taratqan aqparatta.

Oblys prokýratýrasy aýyl sharýashylyǵy salasyndaǵy qylmystyq áreketterden azamattardyń quqyqtaryn qorǵaý jáne zańdylyqty qamtamasyz etýge baǵyttalǵan keshendi sharalardy júzege asyrýdy jalǵastyrady.

Buǵan deıin Ulytaý oblysynda terrorızmdi nasıhattaǵan turǵyn 5 jylǵa sottalǵany belgili boldy.