Bıyl sýarmaly jerdiń kólemi 612 myń gektarǵa jetedi – mınıstrlik
ALMATY. KAZINFORM – Elde aýyl sharýashylyǵy maqsatyndaǵy sýarmaly jerdiń aýdany - 1,9 mln gektar. 2025 jyly sý únemdeý tehnologııasyn qoldana otyryp sýarmaly jerdiń kólemi 612 myń gektarǵa deıin ulǵaıady. Bul týraly Aýyl sharýashylyǵy mınıstrliginiń Kazinform saýalyna joldaǵan jaýabynda aıtylǵan.
Sýarmaly eginshiliktiń tıimdiligin arttyrý perspektıvalary sýdy únemdeıtin sýarý tehnologııalaryn keńinen qoldanýǵa tyǵyz baılanysty, bul sýdy jáne qorektik zattardy núktelik jetkizý arqyly sý tutynýdy azaıtýǵa jáne ónimdilikti arttyrýǵa múmkindik beredi.
Osy maqsatta sýarýdyń zamanaýı sý únemdeý tehnologııasyn engizý jumysy júrgizilip jatyr.
1 mln gektar nemese jerdiń 62% jerústi ádisimen sýarylady, 98 myń gektar nemese 7% — kúrish alqaptaryna sý jaıylady, 470 myń gektarda nemese 31%-da — zamanaýı sý únemdeý tehnologııasy paıdalanylady.
— Memleket basshysynyń sý únemdeý tehnologııalary qoldanylatyn aýmaqtardy jyl saıyn 150 myń gektarǵa deıin ulǵaıtý jónindegi tapsyrmasyna sáıkes, bıyl sý únemdeý tehnologııasyn qoldana otyryp sýarmaly jerdiń kólemi 612 myń gektarǵa deıin ulǵaıady. Al 2030 jylǵa qaraı 1 362 myń gektarǵa jetedi, — delingen jaýapta.
Sý resýrstary jáne ırrıgatsııa mınıstrliginiń dereginshe, 2024 jyldyń qorytyndysy boıynsha sý únemdeý tásilderimen sýarmaly jer aýdany 100,3 myń gektarǵa ulǵaıdy (tamshylatyp sýarý — 43,5 myń gektarǵa, jańbyrlatyp sýarý — 56,8 myń gektarǵa), sondaı-aq 57,6 myń gektar jerdi lazerlik josparlaýshy teńestirdi.
Nátıjesinde osy jyly sý únemdeý tehnologııasyn qoldana otyryp, jyl saıynǵy alańdardy engizý boıynsha kórsetkish 157,9 myń gektarǵa jetti.
— Aıta keteıik, «Sý alý jáne berýge arnalǵan ınfraqurylymyn qurý jáne keńeıtý arqyly sý únemdeıtin sýarý tehnologııalaryn engizý» jobasynyń pasportyna ózgeris engizildi. Qosymsha fermerlerdi sý únemdeý tehnologııasyn qoldanýǵa yntalandyrý maqsatynda ótken jyly fermerlerge sý berý qyzmetteriniń qunyn sýbsıdııalaýdyń ózgertilgen qaǵıdasy kúshine endi. Bul sýarý ádisine baılanysty sýbsıdııa mólsherin saralaýdy jáne sýdy esepke alý aspaptarynyń bolýy týraly shartty kózdeıdi, — dep atap ótti mınıstrlikten.
Sonymen qatar, mınıstrlik qolda bar sý resýrstaryn saqtaý jáne olardy tıimdi paıdalaný maqsatynda sýdy kóp qajet etetin daqyldardy qysqartý jáne sý únemdeý tehnologııalaryn engizý arqyly egis alqaptaryn ártaraptandyrý baǵdarlamasyn iske asyryp jatyr.
Osyǵan deıin Túrkistan óńiri qýańshylyqpen qalaı kúresip jatqanyn jazǵan edik.