Bıyl Pavlodar oblysynda 35 mektep kúrdeli jóndeledi

PAVLODAR. KAZINFORM - Bul maqsatqa bıýdjetten 7,4 mlrd teńge qarajat qarastyrylǵan. Jeti bilim uıasy «Aýyl – el besigi» jobasynyń ıgiligin kóredi.

Pavlodar oblysyndaǵy áleýmettik sala nysandaryn jóndeýge bıyl qazynadan 12,2 mlrd teńge bólingen. Onyń ishinde 7,4 mlrd teńge bilim salasyndaǵy uıymdardy jóndeýge baǵyttalyp otyr.

«Pavlodarda 8 mektepti, Ekibastuzda – 10, Aqsý qalasynda 1 mektepti kúrdeli jóndeýden ótkizý josparlanǵan. Sondaı-aq, Aqtoǵaı, Baıanaýyl, Jelezın, Ertis, Maı, Pavlodar, Ýspen, Sharbaqty jáne Tereńkól aýdandarynyń mektepteri jóndeledi. Aqsý qalasy, Pavlodar men Aqqýly aýdandaryndaǵy 3 balabaqshaǵa kúrdeli jóndeý júrgiziletin bolady. Sonymen qatar, Ekibastuz qalasyndaǵy úsh balabaqshanyń shatyry jańartylyp jatyr»,-dep habarlady Pavlodar oblysynyń ákimdiginen.

Buǵan qosa densaýlyq saqtaý salasyndaǵy 8 qalalyq jáne 11 aýdandyq medıtsınalyq uıymǵa, 17 mádenıet mekemesine, birqatar sport nysandaryna jóndeý júrgizý qarastyrylǵan.