Bıyl ońtústik óńirlerdegi sýarmaly egistikte sý tapshylyǵy bolýy múmkin

ASTANA. KAZINFORM – Aldaǵy aılarda ońtústik óńirdegi sýarmaly egistikterde sý tapshylyǵy baıqalýy múmkin. Bul týraly Úkimet otyrysynda QR Sý resýrstary jáne ırrıgatsııa mınıstri Nurjan Nurjigitov aıtty.

— Elimizdegi sý resýrstarynyń eń iri tutynýshysy – aýyl sharýashylyǵy salasy, onyń úlesine jalpy sý paıdalanýdyń 60 paıyzdan astamy tıesili. Aýyl sharýashylyǵyna jyl saıyn bólinetin 15 tekshe kılometr sýdyń shamamen 12 tekshe kılometri turaqty sýarýǵa jumsalady, onyń 98 paıyzy elimizdiń bes ońtústik oblysyna – Almaty, Jetisý, Jambyl, Túrkistan jáne Qyzylorda oblystaryna tıesili. Kóktemgi aýa raıynyń qalyptan tys jyly bolýyna baılanysty aǵymdaǵy vegetatsııalyq kezeń ortasha jyldyq merzimdermen salystyrǵanda 20 kúnge erte bastaldy, — dedi ol óz baıandamasynda.

Sondaı-aq mınıstr bıyl egistikterde sý tapshylyǵy bolýy yqtımal ekenin atap ótti.

— Aǵymdaǵy vegetatsııalyq maýsymnyń ereksheliginiń biri – vegetatsııa aldyndaǵy kezeńde topyraq ylǵaldylyǵynyń jetkiliksizdigi boldy. Bul faktor ońtústik óńirlerdegi sý sharýashylyǵy jaǵdaıyna aıtarlyqtaı áser etti. Topyraqtyń ústińgi qabatyndaǵy ylǵaldyń az bolýyna baılanysty egistikterdiń vegetatsııanyń bastapqy kezeńindegi sýǵa qajettiligi orta eseppen 50 paıyzǵa artty. Bul sýarmaly kózderge qosymsha júkteme túsirip, aldaǵy aılarda sý tapshylyǵy qaýpin kúsheıtip otyr, - dedi Nurjan Nurjigitov.

Osyǵan deıin kóktemgi egis jumystaryna aýylsharýashylyq tehnıkalary 99% daıyn ekendigi týraly jazdyq.