Bıyl memleket kepildigimen alynatyn qaryz kólemi 1,9 trln teńgege ulǵaıady
ASTANA. KAZINFORM – Úkimet kólik ınfraqurylymyn damytý úshin memleket kepildigimen alynatyn qaryz kólemin 1,9 trln teńgege ulǵaıtady. Bul týraly Senatta ótip jatqan talqylaýda Premer-mınıstrdiń orynbasary Serik Jumanǵarın aıtty.

- Úkimet eldiń kólik ınfraqurylymyn jaqsartýǵa baǵyttalǵan qaryz alý úshin memlekettik kepildikter beredi. Bul bıyl otandyq taýarlar men qyzmetterge suranysty arttyryp, ekonomıkanyń ósý qarqynyn jedeldetedi. Aldaǵy kezeńderde bul bastama tranzıttik tasymaldar, el ishindegi tasymaldar kólemin ulǵaıtyp, tutastaı alǵanda iskerlik belsendiliktiń ósýine yqpal etedi. 2025 jyly memlekettik kepildikter 1,9 trln teńgege ulǵaıady. Bul qurylys jumystarymen qamtýdy 13,1 myń km avtojolǵa jáne 585 km temir jolǵa deıin jetkizýge múmkindik beredi, - dedi vıtse-premer.
Sondaı-aq, ol energetıka men kommýnaldyq sektordy jańǵyrtýdyń ulttyq jobasyna qarjy ınstıtýttarynan qosymsha ınvestıtsııalar tartylatynyn aıtty.
- Ulttyq joba sheńberindegi ınvestıtsııalar kólemi 5 jyl ishinde 13 trln teńgeden asady. Bul rette bıyl ınfraqurylymdy jańǵyrtýǵa arnalǵan ınvestıtsııalar shamamen 1,2 trln teńge bolady, - dedi Serik Jumanǵarın.
Sondaı-aq, bıyl Úkimet «Báıterek» holdınginiń ekonomıkalyq jobalarǵa quıatyn kapıtal kólemin arttyrǵan edi.