Bıyl kúzde LRT testilik rejımde iske qosylady
ASTANA. KAZINFORM – Úkimet basshysy Oljas Bektenovke elordanyń LRT qurylysy boıynsha negizgi kólik jobalarynyń birin iske asyrý barysy týraly 112-stansa alańynda baıandaldy. Bul týraly Úkimettiń baspasóz máslıhaty habarlaıdy.
Ótken jyldyń qorytyndysy boıynsha estakada, aspaly kópir jáne barlyq stansanyń temirbeton konstrýktsııalarynyń qurylysy aıaqtaldy. Jobanyń qajettilikterin qamtamasyz etý úshin Astanada shpaldar óndirisi iske qosyldy. Olardy daıyndaý úshin B-55 markaly beton qoldanylady, armatýranyń aldyn-ala kerneý tehnologııasy qoldanylady. Bul tasymaldaý kezinde qurylymdardyń jarylyp ketýine jol bermeıdi jáne aıazǵa tózimdiligin arttyrady.
Búginde 35 myńnan astam shpal daıyndaldy, jobaǵa barlyǵy 87,6 myń birlik shpal qajet.
Qazir nysanda relster tóselýde — uzyndyǵy 2 shaqyrym bolatyn ýchaskede, sondaı-aq optıkalyq talshyqta jumys aıaqtaldy. Bıyl jumysqa 2 myńǵa jýyq adam jumyldyryldy, jaz mezgilinde nysanǵa 5 myńǵa jýyq maman tartylady.
«CTS» JShS basqarma tóraǵasy Asylbek Dúısebaev qyrkúıek aıynda LRT-ny testilik rejımde iske qosý, ıaǵnı jolaýshysyz poıyzdardy synaqtan ótkizý josparlanyp otyrǵanyn habarlady.
Astanadaǵy jeńil relsti kólik jobasy ozyq GoA4 standartyna sáıkes júzege asyrylyp jatyr, bul 6 aılyq synaq merzimin talap etedi.
Sonymen qatar Premer-mınıstrge LRT boıyndaǵy aýmaqty abattandyrý jobasy tanystyryldy. Áýejaıdan Rysqulov kóshesine deıin iri aǵashtar men kópjyldyq butalar otyrǵyzylyp, avtomatty sýarý júıesin ornatý josparlanǵan. Qabanbaı batyr dańǵyly boıymen Syǵanaq kóshesine deıingi aýmaq balalar jáne sport alańdary, jaıaý júrginshiler joldary qoǵamdyq keńistikterge bólingen. Ári qaraı jolaýshylar aǵyny belsendi 2-temirjol vokzalyna deıin keń avtoturaqtar, velosıpedke arnalǵan joldar jasalyp, kógaldandyrý qarastyrylǵan.
Aıta keteıik, Premer-mınıstr Oljas Bektenov Astana qalasy boıynsha jumys sapary aıasynda Memleket basshysynyń halyqty jylýmen qamtamasyz etý jáne LRT jobasyn iske asyrý jónindegi tapsyrmalarynyń oryndalý barysyn tekserdi.