Bıyl kúzde 20 myńnan asa azamat áskerge shaqyrylady

ASTANA. KAZINFORM – Osy kúzde Otan aldyndaǵy áskerı mindetin ótýge 18 ben 27 jas aralyǵyndaǵy 20 myńnan asa jas shaqyrylady.

QR Qarýly kúshteri bas shtaby uıymdastyrý-jumyldyrý jumysy departamenti bastyǵynyń orynbasary Farhat Aıdarbekovtiń málimdeýinshe, kúzde merzimdi áskerı qyzmetke shaqyrý úshin Qorǵanys isteri basqarmalary men bólimderinde 10 shildeden bastap áskerge shaqyrýshylardy zerttep, zerdeleý jáne irikteý jumystary júrgizildi.

«Jergilikti áskerı basqarý organynyń laýazymdy adamdary zerdeleý barysynda áskerı shaqyrýshylardy otbasy quramyn, áskerı qyzmet ótkerýge jaramdylyq sanatyn, bilimin jáne mamandyǵyn naqtylaıdy. Sondaı-aq jeke isindegi qujattardy zerdelep, áskerge shaqyrýshylarmen áńgimelesedi. Bul rette búgingi tańda 18 ben 27 jas aralyǵyndaǵy áskerge shaqyrýshylar QR boıynsha 730 myń adamnan turady. Sonyń ishinde 120 myńy áskerge daıyn, al 120 myńnyń ishinen biz 40 myńyn merzimdi áskerı qyzmetke shaqyramyz», – dedi F. Aıdarbekov OKQ-de ótken brıfıngide.

Sondaı-aq, Qorǵanys mınıstrliginiń ókili, áskerı qyzmetke shaqyrtý alǵan azamattar áskerı komıssııaǵa kelýge mindetti ekenin eske saldy.

«Shaqyrý qaǵazy azamatqa jeke ózi nemese jumys orny, oqý orny boıynsha uıym basshysynyń qolymen nemese SMS-habarlama arqyly tapsyrylady. Azamatqa shaqyrý qaǵazyn jeke tapsyrý múmkin bolmaǵan jaǵdaıda onyń kelýin qamtamasyz etý tıisti ishki ister organdaryna júkteledi. Merzimdi áskerı qyzmetten bas tartqandar úshin zań boıynsha qylmystyq jáne ákimshilik jaýapkershilik kózdelgen», - dep tolyqtyrdy spıker.

Buǵan deıin Qorǵanys mınıstrligi kámelet jasyna tolǵan jastardy áskerge kósheden eriksiz alyp ketýdiń zańdylyǵyna qatysty túsinik berdi.