Bıyl Qostanaı oblysy men Almatyda KIA jáne mýltıbrendti zaýyttar iske qosylady
ASTANA. KAZINFORM — Qazaqstandyq óndirýshilerden satyp alynatyn taýarlyq pozıtsııalardyń tizbesi úsh esege ulǵaıtyldy. Bul týraly Úkimettiń keńeıtilgen otyrysy Premer-mınıstr Oljas Bektenov óńirlerdiń ekonomıkalyq ósimine túsinik berdi.

- Ótken jyly Úkimet negizinen otandyq taýar óndirýshilerdi qoldaý máselelerine basymdyq berdi. Memlekettik satyp alýlar sheńberinde tek qana qazaqstandyq óndirýshilerden satyp alynatyn taýarlyq pozıtsııalardyń tizbesi 4,5 myń ataýǵa deıin, ıaǵnı úsh esege ulǵaıtyldy, - dedi O.Bektenov.
Onyń aıtýynsha, retteletin satyp alýlar aıasynda otandyq kásiporyndarmen jalpy quny 1 trln teńgeden astam somaǵa uzaq merzimdi jáne ofteık-kelisimsharttar jasaldy. Bul kórsetkish 2,5 esege ósti.
- Óz kezeginde, óndirýshiler kásiporyndardy tehnologııalyq jańǵyrtý, ónimniń sapasyn jáne jergilikti óndiris kólemin arttyrý, eńbek jaǵdaıyn jaqsartý boıynsha mindettemeler alýda. Mysaly, avtomobıl óndirýshilerdiń lokalızatsııalaýdy bıyl 30%-ǵa deıin, al 2027-shi jylǵa qaraı 50%-ǵa deıin arttyrý boıynsha mindettemeleri belgilendi. Bıyl eki iri avtomobıl zaýytyn, atap aıtqanda Qostanaı oblysy men Almaty qalasynda jalpy óndiristik qýattary jylyna 160 myń avtokólikti quraıtyn KIA jáne mýltıbrendti zaýyttaryn iske qosamyz, - dedi Úkimet basshysy.
Onyń sózine qaraǵanda, byltyr Úkimet syrttan keletin traktorlar men kombaındardy sýbsıdııalaýdan bas tartty. Bul osyǵan deıin Qazaqstanda óz zaýyttaryn ashqan sheteldik aýyl sharýashylyǵy tehnıkasyn óndirýshiler úshin tıimdi boldy. Máselen, Petropavldaǵy Claas nemis kontserniniń zaýytyna jasalǵan tapsyrys kólemi 2 esege ósti. Búginde basqa da aýyl sharýashylyǵy tehnıkalaryn óndirýshiler Qazaqstanda óndiristerin lokalızatsııalaýdy bastady.
- Elektrovozdar men lokomotıvter óndirisinde Alstom jáne Wabtec zaýyttary eleýli tehnologııalyq jetistikterge qol jetkizdi. Ótken jyly Atyraý oblysynda quny 350 mln dollar, al jyldyq qýaty 6 myń vagondy quraıtyn zaýyt iske qosyldy. Bıyl Astanadaǵy Stadler zaýyty alǵashqy 50 jolaýshylar vagonyn shyǵarýdy bastaıdy, - dedi Premer-mınıstr.
Budan buryn habarlanǵandaı, 2024 jyly ekonomıka 4,8 paıyzǵa ósti. Aýyl sharýashylyǵynda 13,7 paıyz, qurylysta — 13,1, saýdada — 9,1, kólik salasynda 8,5 paıyz deńgeıinde ósimge qol jetkizildi. Óńdeý ónerkásibiniń kólemi 5,9 paıyzǵa ulǵaıdy. Agrarlyq sektor men óńdeýshi salada sońǵy 10 jyl ishindegi eń qarqyndy ósim tirkeldi.