Bıyl kólik polıtseıleri 20 mıllıon jolaýshynyń qaýipsizdigin qamtamasyz etti

ASTANA. KAZINFORM — Іshki ister mınıstrliginiń Kóliktegi polıtsııa departamenti áýe jáne temirjol kóligi obektilerinde quqyq buzýshylyqtardyń aldyn alý jáne jolaýshylardyń qaýipsizdigin qamtamasyz etý baǵytynda júıeli jumystardy jalǵastyrýda, dep habarlaıdy Polisia.kz.

Vedomstvonyń málimetinshe, 2025 jyldyń basynan beri kólik polıtseıleri temirjol jáne áýe kóligimen qatynaǵan 20 mıllıonǵa jýyq jolaýshynyń qaýipsizdigin qamtamasyz etken. Atap aıtqanda, 11 mıllıondaı adam temirjol kóligin, al 8,9 mıllıonnan astam azamat áýe qatynasyn paıdalanǵan.

Kóliktegi polıtsııa departamenti bastyǵynyń birinshi orynbasary Madııar Aıtýǵanovtyń aıtýynsha, Astana qalasynyń halyqaralyq áýejaıy arqyly bıyl 6 aıda 4,3 mıllıon jolaýshy ótken, onyń ishinde 2 997 981 adam — ishki, 1 376 954 adam — halyqaralyq baǵytpen ushqan.

«Kólik nysandaryn zańsyz áreketterden qorǵaý máselesi ózekti kúıinde qalyp otyr», — dedi ol.

Búginde Departament pen onyń jelilik bólimsheleri «Quqyqtyq tártip», «Kóliktegi qaýipsizdik», «Zańsyz kelýshi», «Qarasora» sekildi jedel-aldyn alý is-sharalaryn turaqty negizde ótkizip keledi.

Madııar Aıtýǵanovtyń sózinshe, jyl basynan beri elordalyq áýejaıda 34 myńnan astam áýe reısi men 4,3 mıllıon jolaýshy tekserilip, nátıjesinde 100-den asa tyıym salynǵan zat tárkilengen, 53 qylmys pen 1 348 quqyq buzýshylyq anyqtalǵan. Sonymen qatar 43 atys jáne sýyq qarý aınalymnan alynǵan.

Kólik polıtsııasy qylmystardyń aldyn alýda zamanaýı tsıfrlyq sheshimderdi, qyzmettik-izdestirý ıtterin keńinen qoldanýda. Jedel jaǵdaılar turaqty taldanyp, quqyq buzýshylyq jıi tirkeletin ýchaskelerge jasaqtar baǵyttalady.

Atqarylǵan jumystardyń nátıjesinde 48 myńǵa jýyq adam ákimshilik jaýapkershilikke tartylǵan.

Aıta keteıik, ІІM bıylǵy jyldy «Profılaktıka jyly: polıtsııa — zań men tártip kúzetinde» dep jarııalaǵan. Bul bastama qoǵamdyq qaýipsizdikti nyǵaıtyp, quqyq buzýshylyqtardyń aldyn alýǵa baǵyttalǵan.

Eske salaıyq, Almaty polıtsııasy Qytaıda prank túsirgen blogermen profılaktıkalyq áńgime júrgizdi.