Bıyl Qyzylordada úsh zaýyt iske qosylady – Úkimet
ASTANA.KAZINFORM — Premer-mınıstrdiń orynbasary – ulttyq ekonomıka mınıstri Serik Jumanǵarın ekonomıkanyń naqty sektoryn damytý máseleleri boıynsha keńes ótkizdi, onda Qyzylorda oblysynyń ınvestıtsııalyq damýy qaraldy.
Byltyr jalpy quny 1,9 trln teńgeni quraıtyn 86 ınvestıtsııalyq jobany iske asyrý jónindegi bes jyldyq baǵdarlama sheńberinde óńirde 411 jańa jumys ornyn ashqan 37 mlrd teńgege 21 joba iske asyryldy. Onyń ishinde 6 joba qurylys materıaldaryn óndirý boıynsha, 10 joba agroónerkásiptik salada, 1 joba kólik logıstıkasy salasynda, qalǵandary saýda jáne bilim berý salasyna qatysty. Іri jobalardyń qatarynda Qorqyt ata áýejaıynyń jańa termınaly bar. 2025 jyly Qyzylorda oblysynda myńǵa jýyq jumys ornyn quryp, 30,8 mlrd teńge ónim shyǵarýǵa múmkindik beretin 275,3 mlrd teńgeni quraıtyn 24 jobany iske qosý josparlanýda. Іri zaýyttardyń qatarynda qýaty jylyna 90 mln dana kirpish shyǵarý, túıe sútinen jylyna 392 tonna untaq óndirý, jolaýshylar vagondaryn jóndeý, tehnıkalyq qyzmet kórsetý jáne salý jónindegi jobanyń birinshi kezeńi, qýaty 240 MVt bolatyn jańa JEO qurylysy bar.
— Aldaǵy ýaqytta jalpy qýaty 141 MVt bolatyn 4 kún jáne 1 jel elektr stansasynyń qurylysyn júzege asyrýdy josparlap otyrmyz. Oblystyń elektr energııasyna degen suranysy táýligine 200 MVt-ty quraıdy, óńirde jalpy qýaty 89 MVt bolatyn 9 kún elektr stansasy jumys isteıdi. 5 joba iske qosylǵanda óńirimiz tolyǵymen jasyl energetıkaǵa kóshedi, — dep atap ótti oblys ákiminiń orynbasary Ardaq Zebeshev.
QR SІM Investıtsııalar komıteti qatysýshylarǵa Ulttyq tsıfrlyq ınvestıtsııalyq platformany ıaǵnı ınvestorlardyń, memlekettik organdardyń jáne kvazımemlekettik sektordyń ózara is-qımyly úshin biryńǵaı tereze múmkindikterin tanystyrdy. Búginde platforma pýlynda 836 joba bar, onyń 246-syn osy jyly júzege asyrý josparlanýda.
Keńeste oblystaǵy eki iri ınvestıtsııalyq jobany júzege asyrýǵa qatysty túıtkildi máseleler talqylandy. Bul «Shalqııa» polımetall ken ornynyń tıimdiligin arttyrý jáne kaltsıılendirilgen soda óndiretin zaýyt salý.
Atap aıtqanda, taǵamdyq jáne ónerkásiptik as tuzyn, polıpropılendi qapshyqtar shyǵaratyn «Araltuz» AQ qazirgi tańda Qazaqstandaǵy kaltsıılengen soda shyǵaratyn alǵashqy zaýyt qurylysynyń jobasyn iske asyrýda. Shyny bótelkelerdi óndirýge qajetti bul shıkizat komponenti elimizde tolyǵymen ımporttalady. Joba aıtarlyqtaı ınvestıtsııalardy qajet etedi, nesıelik qarjylandyrý merzimderi men sharttaryn uzartý boıynsha máseleler bar. Vıtse-premer tıisti qarjy ınstıtýttaryna jobany qoldaý úshin barlyq múmkindikterdi qarastyrýdy tapsyrdy.
— Memlekettik organdar ınvestıtsııalyq jobalardy júzege asyrýdaǵy kedergilerdi joıýda bızneske barynsha kómek kórsetýi kerek. 2025 jylǵa arnalǵan 246 jobanyń maqsaty – jaqsy kórsetkish, oǵan jetý úshin múmkindiginshe barlyq kedergilerdi joıyp, ýaqytyly qarjylandyrýdy qamtamasyz etý kerek. Ol úshin qysqa merzim ishinde Investıtsııalar komıteti Ónerkásip mınıstrligimen jáne ákimdiktermen birge basym sala ári joǵary qosylǵan qun qaǵıdaty boıynsha jobalardy gradatsııalaýdy júrgizýi qajet. Sonymen qatar nátıjelerge súıene otyryp, olardy júzege asyrýǵa qoldaý bildirýi kerek, — dep qorytyndylady jıyndy Serik Jumanǵarın.
Eske sala keteıik, búgin Úkimette Oljas Bektenov jalǵa beriletin jeńildikti turǵyn úı baǵdarlamasyn keńeıtý qajet degen másele kótergen bolatyn.