Bıyl Qazaqstannan Ózbekstanǵa baǵyttalǵan aqsha aýdarymdary artty

TAShKENT. KAZINFORM – Jyl basynan beri Ózbekstanǵa baǵyttalǵan aqsha aýdarymdarynyń kólemi 25%-ǵa ósip, 6,5 mlrd dollarǵa jetti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Ózbekstan Ortalyq bankiniń tóraǵasy Mamarızo Nýrmýratov BAQ ókilderine arnalǵan baspasóz maslıhatynda málim etkenindeı, aýdarymdardyń kólemi aldyn ala jasalǵan boljamnan 2 ese asyp tústi. Qarjy retteýshisi alǵashqy jartyjyldyqta ósim 11-12% kóleminde bolady dep josparlaǵan. 

Bul rette, Mamarızo Nýrmýratov elge aqshalaı túsimder boıynsha Reseıdiń úlesi 2022 jylǵy 81-82%-dan 77%-ǵa qysqarǵanyn atap ótti.

Óz kezeginde Qazaqstannan Ózbekstanǵa jasalǵan aqsha aýdarymdarynyń kólemi 347 mln dollarǵa ósti. Al AQSh-tan – 271 mln dollarǵa, Ońtústik Koreıadan - 267,3 mln dollarǵa artyp otyr. Buǵan qosa, Germanııa men (+64%) Polshadan (+93%) aqsha túsimderi ulǵaıdy.