Bıyl qashyqtan 2,7 mıllıon medıtsınalyq qyzmet kórsetildi — DSM

ASTANA. KAZINFORM — Qazaqstandyqtar medıtsınalyq kómekti barǵan saıyn qashyqtan alyp otyr. Bıyl 9 aıda halyqqa onlaın formatta 2,7 mıllıon qyzmet kórsetildi. Bul josparly kórsetkishterden asyp, emhanalardaǵy júktemeni azaıtýǵa múmkindik berdi, dep habarlaıdy Densaýlyq saqtaý mınıstrligi.

Medıtsınalyq kómektegi onlaın-qyzmetterdiń úlesi josparlanǵan 7%-dyń ornyna 8,65% boldy.

Qyzmet kóleminiń artýyna jańa tetikterdiń engizilýi yqpal etti. 

• meıirgerlerge birqatar fýnktsııalardy keńeıtilgen túrde baǵyttaý;
• qabyldaýǵa qashyqtyqtan aldyn ala jazylý júıesin iske qosý;
• «josparlanǵan qabyldaý» júıesi arqyly patsıent marshrýtyn ońtaılandyrý.

Osynyń arqasynda kezekter qysqaryp, emhanalarǵa qajetsiz barý azaıdy — kómek jyldamyraq ári qoljetimdi bola tústi.

Aýyl jáne shalǵaı aımaq turǵyndaryna erekshe kóńil bólinip otyr. Bıyl 8 óńirdegi 100 medıtsına uıymyn qamtyǵan «Onlaın-medıtsına» pılottyq jobasy bastaldy. Endi beıindi mamandar joq eldimekenderdiń ózinde dárigerlerdiń konsýltatsııasyn alý múmkindigi bar.

Tsıfrlyq tehnologııalar medıtsına qyzmetkerlerine de tıimdi.

Medıtsınalyq aqparattyq júıelerdi ıntegratsııalaý jáne jasandy ıntellektini qoldaný mynadaı nátıjeler berdi:

• elektrondyq retseptterdi rásimdeý ýaqyty 60% qysqardy;
• júkti áıel kartasyn toltyrý ýaqyty 40% azaıdy.

Jyl sońyna deıin mınıstrlik tsıfrlyq densaýlyq saqtaýdy odan ári damytý úshin negizgi platforma — Biryńǵaı medıtsınalyq derekter qoımasyn qurýdy aıaqtaýdy josparlap otyr.

Aıta keteıik, Qazaqstan men Túrkııa medıtsınadaǵy tsıfrlyq seriktestikti kúsheıtedi.