Bıyl ǵylymı sharýashylyqtardaǵy egis kólemi 4,6%-ǵa artady
ASTANA KAZINFORM — Ulttyq agrarlyq ǵylymı-bilim berý ortalyǵynyń quramyna kiretin aýyl sharýashylyǵy tájirıbe stantsııalary men sharýashylyqtarynda bıylǵy egis naýqanyna josparly daıyndyq júrgizilýde.
Bıyl egis 110 581 gektar alqapta júrgiziledi dep josparlanǵan. Bul ótken jylmen salystyrǵanda 4,6 paıyzǵa kóp.
Ortalyqtyń aýyl sharýashylyǵy uıymdarynyń jalpy jer qory 143 690 gektar jyrtylatyn jerdi qamtıdy. Ǵylymı negizdelgen eginshilik qurylymyna sáıkes onyń 18 456 gektary súri jer retinde qaldyrylady. Súri jerdi saqtaý topyraqta ylǵal jınaýǵa, aramshópterdiń kóbeıýin azaıtýǵa jáne topyraq qunarlylyǵyn saqtaýǵa múmkindik beredi.
Osy jylǵa arnalǵan egis alqaptarynyń qurylymy agroklımattyq jaǵdaılar men ǵylymı negizdelgen aýyspaly egis talaptaryn eskere otyryp qalyptastyrylǵan. Atap aıtqanda, maıly daqyldardyń egis kólemi 12,3 paıyzǵa ulǵaıtylady. Bul olardyń naryqtaǵy baǵasynyń joǵary bolýyna baılanysty. Sonymen qatar mal sharýashylyǵyn damytýǵa qoldaý kórsetý maqsatynda mal azyqtyq daqyldardyń egis kólemi 8,9 paıyzǵa arttyrylady. Egis naýqanyn sapaly tuqymmen qamtamasyz etýge erekshe kóńil bólinýde. Qazirgi ýaqytta aýyl sharýashylyǵy daqyldarynyń 236 sorty ósirilip jatyr. Al tuqymdyq egis alqaptarynyń kólemi 40 875 gektar. Jalpy tuqym ónimi 64 853 tonna bolady dep baǵalanýda.
Tazalaý jáne óńdeý jumystarynyń nátıjesinde is júzinde 38 myń tonnaǵa jýyq sapaly tuqym alynǵan. 2026 jyly bul kórsetkishti 43 119 tonnaǵa deıin arttyrý josparlanǵan. Osy maqsatta tuqymdy úzdiksiz tazalaý men irikteýdi qamtamasyz etý, saqtaý jáne tasymaldaý talaptaryn qadaǵalaý, sondaı-aq otandyq selektsııa tuqymdarynyń úlesin kóbeıtý baǵytynda jumystar júrgizilýde.
Egis naýqanyna daıyndyq aıasynda ósimdik aýrýlary men zııankesterdiń taralý qaýpin azaıtýǵa arnalǵan birqatar sharalar da qolǵa alynǵan. Atap aıtqanda, tuqym sapasyna baqylaý júrgiziledi, ony tasymaldaý men saqtaý kezinde belgilengen talaptar saqtalady, sondaı-aq karantındik zııankester men aýrýlardyń taralýyna jol bermeý úshin aldyn alý sharalary atqarylýda.
Jalpy alǵanda, 2026 jylǵy egis naýqanyna daıyndyq júıesi óndiristiń tehnologııalyq turaqtylyǵyn arttyrýǵa, óz selektsııasyn damytýǵa jáne ǵylymı negizdelgen agrotehnologııalardy engizýge baǵyttalǵan. Bul jer resýrstaryn tıimdi paıdalanýǵa, ónimdilikti turaqtandyrýǵa jáne aýyl sharýashylyǵy óndirisiniń ekonomıkalyq tıimdiligin arttyrýǵa múmkindik beredi.
Aıta ketelik Túrkistan oblysynda 7 myń gektar jerge kókónis egilgeni týraly jazǵan edik.