Bıyl elordada jylý tarıfi ózgere me

ASTANA. KAZINFORM — «Astana-Teplotranzıt» AQ basshylyǵy jylý tarıfi qunyna qatysty túsinik berdi. 

Kompanııa basqarma tóraǵasynyń orynbasary Serik Amangeldınovtiń aıtýynsha, uıym tarıfti ózgertýge ótinim bergen, alaıda baǵa jaqyn arada óspeıdi.

— Baǵa ósedi degen aqparat jalǵan. Bıyl kóterilgen joq, 1 qyrkúıekten bastap qymbattaý bolmaıdy, — dedi ol baspasóz týry barysynda.

Onyń málimdeýinshe, jylý tarıfin ózgertý týraly ótinimde bes jyldyq kezeń eseptelgen. Maquldanǵan jaǵdaıda tarıf 2026 jyldyń 1 qańtarynan bastap kúshine enedi.

— Árıne, baǵany kóterýdi suraımyz, sebebi barlyq materıal jáne salyq mindettemesi qymbattap jatyr. Barlyq jeli bizdiń balansta, aktıvterdiń quny joǵary. Sáıkesinshe, salyq júktemesi de artyp otyr. Osyǵan baılanysty shtat sanyn kóbeıtip, materıaldar satyp alý qajet, al olar qymbat. Sondyqtan baǵa qaıta qaralady, — dep túsindirdi kompanııa ókili.

Bıyl jylý tarıfi shamamen 10%-ǵa ósken, keler jyly 20%-ǵa arttyrýdy usynyp otyr.

Eske sala keteıik, jyl basynda elorda jurtynyń jylý tarıfin ústeme baǵamen tólep kelgeni anyqtaldy.