Bıyl elordada neshe shaqyrym jol jóndeledi

ASTANA. KAZINFORM – Osy jyly elordada 15 shaqyrymǵa jýyq jol jańadan salynyp, 70 shaqyrym jol jóndeledi.

Astana ákimdiginiń málimetine qaraǵanda, bıyl elordada uzyndyǵy 14,7 km bolatyn 43 nysannyń qurylysy josparlanǵan. Segiz joba boıynsha jumys tolyq kólemde aıaqtalady, 28 joba jalǵasady, taǵy jeteýi bastalady.

Onyń ishinde:

- Q. Qaısenov kóshesi Buqar jyraý kóshesinen Uly Dala dańǵylyna deıin;

- Buqar jyraý kóshesi Ál-Farabı dańǵylynan Joshy han kóshesine deıin;

- Rysqulov kóshesi Máńgilik El dańǵylynan Nura-Esil kanalyna deıin jáne basqa joldar bar.

- Bıyl qalanyń jol ınfraqurylymyn jaqsartý baǵdarlamasy aıasynda 60-tan astam kóshede ortasha jóndeý jumystaryn júrgizý josparlanǵan. Bul rette jalpy uzyndyǵy 70 shaqyrymnan astam jol qamtylady. Jumystar jol jamylǵysynyń sapasyn qalpyna keltirýge jáne jaqsartýǵa, sonymen qatar jol qozǵalysy qaýipsizdigi men turǵyndar úshin jaılylyqty arttyrýǵa baǵyttalǵan, - delingen ákimdiktiń Kazinform agenttigine bergen jaýabynda.

Máselen, 10 sáýirden bastap kelesi kósheler boıynsha jumystar bastaldy:

- Alash tas joly 69 kósheden 191 kóshege deıin;

- Qorǵaljyn tas joly Turan dańǵylynan 128 kóshege deıin;

- Syǵanaq kóshesi Qabanbaı batyr dańǵylynan jol aıryǵyna deıin (ótken jyly jumystar Sh. Aıtmatov kóshesinen Qabanbaı batyr dańǵylyna deıingi ýchaskede júrgizilgen);

- sondaı-aq Jańaqonys, Qartaly, Fahd ben Abdýl Azız, Gertsen, Sh. Bókeev jáne basqa da turǵyn alaptaryndaǵy kósheler.

Eske salsaq, bıyl Qazaqstan aýmaǵynda 13 myń shaqyrym jolda jóndeý jumystary júzege asady.