Bıyl elimizde qansha astyq jınalady – AShM boljamy

Elimizde astyq jınaý maýsymy aıaqtalýǵa jaqyn. Bul týraly Aýyl sharýashylyǵy vıtse-mınıstri Azat Sultanov málim etti, dep habarlaıdy Kazinform. 

«Soltústik Qazaqstan oblysy dándi daqyldardy jınaýdy aıaqtady. Qostanaı jáne Aqmola oblystary, ıaǵnı negizgi astyq egetin óńirlerde eginniń 90%-y jınaldy», - dedi Azat Sultanov KazAgro-2023 halyqaralyq kórmesi barysynda BAQ ókilderiniń suraǵyna jaýap bere otyryp.

Onyń aıtýynsha, qazanda egin jınaý jumystaryn aıaqtaý josparlanyp otyr.

«Biz buǵan deıin naqtylanǵan boljam jasaǵanbyz. Sol boıynsha bıyl 15,6 mln tonna astyq jınalmaq. Boljam ázirge rastalyp otyr. Ótken jyldan qalǵan astyqty eskere otyryp, ishki naryqty áleýmettik mańyzy bar ónimdermen qamtamasyz etýge jetkilikti. Bul degenimiz un, makaron jáne nan. Áleýmettik nannyń baǵasy arnaıy sýbsıdııalaý baǵdarlamasy arqyly retteledi, sondyqtan tutynýshylar ýaıymdamasyn», - deıdi mınıstrdiń orynbasary.