Bıyl eldegi jalpy egis alańy 23,8 mln gektar boldy
ASTANA. KAZINFORM – Osy jyly maıly daqyldardyń egis kólemi 4 mln gektardan asady. Bul týraly Úkimet otyrysynda Aýyl sharýashylyǵy vıtse-mınıstri Azat Sultanov málim etti.
- Jyl basynan beri kóktemgi egis jumystaryn sapaly ári ýaqytyly júrgizý máselesi mınıstrliktiń erekshe baqylaýynda. Barlyq problemalyq másele múddeli taraptardyń qatysýymen Jedel shtab otyrystarynda qaralyp jatyr. Mınıstrlik ákimdiktermen birlesip egis alqaptarynyń qurylymyn bekitti. Osylaısha, jalpy egis alańy 23,8 mln gektarǵa jetip, ótken jyldyń deńgeıinen 180 myń gektarǵa artty. Basymdyq joǵary rentabeldi daqyldarǵa berildi. Atap aıtqanda, maıly daqyldardyń egis kólemi bıyl 4 mln gektardan asady (74 myń gektarǵa ulǵaıady), mal azyǵy daqyldary 3,3 mln gektar (237 myń gektarǵa kóp), - dedi A.Sultanov.
Sonymen qatar júgerini qaıta óńdeý boıynsha iske qosylatyn ınvestıtsııalyq jobalardy shıkizatpen qamtamasyz etý maqsatynda júgeriniń egis kólemi 265 myń gektarǵa deıin ulǵaıtylady.
- Іshki naryqty áleýmettik mańyzy bar azyq-túlik taýarlarymen qamtamasyz etý maqsatynda uıymdasqan sharýashylyqtarda kartoptyń alqabyn 10 myń gektarǵa ulǵaıtý josparlandy. Bekitilgen egis qurylymy ishki qajettilikti tolyq qamtamasyz etýge jetkilikti, sonymen birge naryq konıýnktýrasy men syrtqy suranysty eskeredi, - dedi vıtse-mınıstr.
Budan buryn habarlanǵandaı, Aýyl sharýashylyǵy vıtse-mınıstri Azat Sultanov shegirtke zııankesterine qarsy hımııalyq óńdeý jumystary kórshi eldermen birlese júzege asatynyn aıtty.
