Bıyl eldegi kúrish alqaptary taǵy 7,5 myń gektarǵa qysqarady

ASTANA. KAZINFORM — Aýyl sharýashylyǵy mınıstri Aıdarbek Saparov Úkimet otyrysynda bıyl sýdy kóp qajet etetin daqyldardyń lımıti qalaısha bekitilgenin málim etti.

— Bıyl egis qurylymy sýdyń naqty lımıtine baılanysty bekitildi. Qyzylorda, Túrkistan jáne Jambyl oblysynda kezdesý ótkizip, túsindirý jumystary júrgizildi. Búginde Túrkistan jáne Qyzylorda oblystarynda kúrish pen maqtany ń egis alańdary bekitildi. Jalpy bıyl Qyzylorda oblysynyń kúrish alqaby ındıkator boıynsha 77 myń gektar bolý kerek edi. Taǵy 10 paıyz túsirip, 73 myń gektar dep bekittik. Al Túrkistan oblysynda 3,5 myń gektarǵa qysqardy, — dedi vedomstvo basshysy.

Onyń sózinshe, osydan eki jyl buryn sý únemdeý tehnologııasy engizilgen maqta alqabynda 2,5 myń gektar bolǵan.

— Eki jyldyń ishinde 50 myń gektarǵa deıin jetkizdik. Sonyń arqasynda shyǵym jaqsaryp, bıyl taǵy 15 myń gektarǵa sý únemdeıtin tamshylatyp sýarý tehnologııasyn engizý kózdelip otyr. Sonda jalpy 65 myń gektar sý únemdeý tehnologııasy bolady. Aqpan aıynyń aıaǵynda lımıt boljamy kóbeıip jatsa, aımaqtarmen qosymsha pysyqtaımyz, — dedi Aıdarbek Saparov.

Premer-mınıstr ákimdikterge mınıstrlik bekitken lımıtterdiń oryndalýyn qatań baqylaýdy tapsyrdy.

Aıta keteıik, búgin Úkimet otyrysynda sý únemdeý tehnologııalaryn engizý sharalaryn pysyqtalyp jatyr.