Bıyl egis naýqany alǵash ret merziminde aıaqtaldy
ACTANA. KAZINFORM - Elimizde qarjylandyrý tásilderin qaıta qaraý nátıjesinde 2025 jyly egis naýqany alǵash ret merziminde aıaqtaldy. Bul týraly Úkimettiń baspasóz qyzmeti habarlady.
Úkimet Memleket basshysynyń tapsyrmasy boıynsha sharýalardy qarjylandyrý tetigin qaıta qarady. Osy jyldan bastap fermerlerge jeńildetilgen nesıeler burynǵydaı naýqan bastalǵan kezde naýryz aıynda emes, aldyn ala 2024 jyldyń jeltoqsanynan bastap qoljetimdi boldy. Bul sheshim qajetti resýrstardy aldyn ala satyp alýǵa múmkindik berý maqsatynda qabyldandy.
Memlekettik qoldaý sharalarynyń, dıqandar men jergilikti atqarýshy organdardyń úılesimdi jumysynyń arqasynda egis jumystary agrotehnıkalyq talaptarǵa saı ári ýaqtyly júrgizilip, naýqan alǵash ret belgilengen merziminde aıaqtaldy. Mundaı tásil negizgi dala jumystaryn merziminen buryn oryndaýǵa, strategııalyq mańyzdy daqyldardyń egis kólemin arttyrýǵa jáne materıaldyq-tehnıkalyq bazany tıimdi jańartýǵa múmkindik berdi. Sonyń nátıjesinde mol ónim alýǵa jáne aýyl sharýashylyǵynyń turaqty damýyna berik negiz qalandy.
2025 jylǵy egis naýqany elimizde eginshilikke degen jańa kózqaras jaǵdaıynda ótti. Onyń basty erekshelikteriniń biri – aýyl sharýashylyǵy óndirisin ártaraptandyrýǵa jáne monodaqyldarǵa táýeldilikti azaıtýǵa basymdyq berilýi. 6 maýsymdaǵy jaǵdaı boıynsha josparlanǵan kólemniń 100%-y – 23,7 mln gektar alqap egildi.
Egis alqaptaryn neǵurlym tıimdi ári turaqty daqyldarǵa qaıta bólýge erekshe nazar aýdaryldy. Bul aýyl sharýashylyǵyn klımattyq ózgeristerge beıimdeýge ǵana emes, sonymen qatar ǵylymı negizdelgen aýyspaly egis talaptaryn saqtaı otyryp, naryqtyq úrdisterdi eskerýge múmkindik berdi. Nátıjesinde suranysqa ıe daqyldardyń kólemi artty:
maıly daqyldar – 3,4 mln gektar (byltyrǵydan 0,5 mln gektarǵa artyq),
mal azyǵy daqyldary – 3,3 mln gektar (+114 myń gektar),
dándik júgeri – 167,5 myń gektar,
kókónis-baqsha daqyldary – 222,3 myń gektar.
Áleýmettik mańyzy bar daqyldar kólemi de artyp jatyr: kartop alqaby 83,4 myń gektarǵa jetip, ótken maýsymmen salystyrǵanda 11,3 myń gektarǵa kóbeıdi. Sonymen qatar resýrsty kóp qajet etetin ári baǵa ózgerisine beıim daqyldardyń – bıdaı, kúrish, maqta – egis kólemi qysqaryp jatyr. Mysaly, bıdaı alqaby 13 mln gektar boldy, bul ótken jylǵydan 187 myń gektarǵa kem.
Osylaısha, egisti ártaraptandyrý strategııasy elimizdiń azyq-túlik qaýipsizdigin nyǵaıtýǵa jáne agroónerkásip kesheniniń eksporttyq áleýetin damytýǵa serpin berip jatyr.
Tuqym qoryna kelsek, 2025 jylǵy egis naýqanyna respýblıka boıynsha 2,3 mln tonna tuqym daıyndaldy.
Bul dıqandardyń dala jumystaryna esh kidirissiz, qajetti resýrstar tapshylyǵynsyz ýaqytynda shyǵýyna múmkindik berdi.
Kóktemgi egis naýqanyn qarjylandyrý bıyl 1 jeltoqsanda bastalatynyn jazǵan bolatynbyz.