Bıyl 10 myń oryndyq 27 ctýdentter jataqhanasy paıdalanýǵa beriledi
ASTANA. KAZINFORM – Úkimette kolledj ben joǵary oqý oryndarynyń stýdentterin jataqhanamen qamtý máselesi qaraldy. QR Premer-Mınıstriniń orynbasary Tamara Dúısenovanyń tóraǵalyǵymen ótken keńeske ortalyq memlekettik organdardyń ókilderi men oblys ákimderiniń orynbasarlary qatysty.
Ǵylym jáne joǵary bilim vıtse-mınıstri Talǵat Eshenqulovtyń sózinshe, bıyl 10 576 orynǵa shaqtalǵan 27 jataqhanany qoldanysqa berý josparlanǵan. Olardyń 19-y joǵary oqý oryndaryna, 8-i kolledjderdiń stýdentterine salynýy tıis edi.
«Qazirde 1540 orynǵa arnalǵan 7 jataqhanada tıisti jumystar tolyǵymen aıaqtalyp, keler oqý jylyna stýdentterdi qabyldaýǵa ázir. Qurylys nemese rekonstrýktsııa jumystaryn júrgizý boıynsha oblystar men respýblıkalyq mańyzy bar qalalarda jol kartalary daıyndaldy. Josparlanǵan nysandardyń deni qyrkúıekke deıin paıdalanýǵa berilmek», — dedi Talǵat Eshenqulov.
Jıyn barysynda ár nysandaǵy jumys qarqyny jekeleı qarastyryldy. Ǵylym jáne joǵary bilim vıtse-mınıstri búginde qurylys, rekonstrýktsııa qarastyrylǵan ǵımarattardyń basym kópshiliginde jumys 75% deńgeıinen joǵary oryndalǵanyn jetkizdi. Úsh nysandaǵy tıisti jumystar 50% shamasynda atqarylǵan. Olar Almaty qalasy men Aqmola, Qyzylorda oblystaryna tıesili. Aımaq ákimderiniń orynbasarlary barlyq sharalar josparǵa saı aıaqtalady dep sendirdi. Tamara Dúısenova máseleniń mańyzdylyǵyna erekshe toqtalyp, tıisti tapsyrma berdi.
«Qurylys maýsymynyń ýaqyty shekteýli. Sondyqtan jaýapty mınıstrliktermen qatar oblys ákimdikteri jumystyń ýaqtyly ári sapaly atqarylýyn turaqty túrde qadaǵalaýy kerek. Nysandardaǵy qurylys, rekonstrýktsııa sharalarynyń qarqynyn apta saıyn qarastyratyn bolamyz. Bul jumysqa jeke kásipkerlerdiń qyzyǵýshylyǵy joǵary ekeni baıqalady. Sol sebepti jataqhana salýǵa nıetti bıznes ókilderine qajetti jaǵdaı jasaýǵa qatysty sharalardy qarastyrý qajet», — dep atap ótti vıtse-premer.
Stýdentterdi jataqhanamen qamtý jumysy qarqyndy júrýde. Byltyr 10 304 orynǵa arnalǵan 43 ǵımarat paıdalanýǵa berilgen. Alaıda, demografııalyq ósim qosymsha oryndardy qarastyrýdy qajet etedi. Osy rette Ǵylym jáne joǵary bilim mınıstrligi uzaqmerzimdi jospardy da ózektendirýdi qolǵa aldy.
