Bıyl Baýyrjan Momyshuly men Talǵat Bıgeldınov atyndaǵy áskerı kolledjder ashylady
ASTANA. KAZINFORM – Bıyl Baýyrjan Momyshuly men Talǵat Bıgeldınov atyndaǵy áskerı kolledjder ashylady. Bul týraly Qorǵanys mınıstrligi Áskerı bilim jáne ǵylym departamentiniń bastyǵy, polkovnık Murat Oljabaev aıtty.
- Tehnıkalyq jáne kásiptik bilim berýdi Astana, Şýche jáne Shymkent qalalaryndaǵy úsh áskerı kolledj usynady. Kolledjderde motoatqyshtar, tank, artıllerııa jáne ınjenerlik bólimsheler, baılanys jáne adıatsııalyq, hımııalyq jáne bıologııalyq qorǵaý áskerleri, qarý-jaraq pen áskerı tehnıkany paıdalaný jáne jóndeý bólimsheleri úshin kásibı serjanttar daıarlanady. Budan basqa, Qorǵanys mınıstrligi Almaty jáne Qaraǵandy qalalarynda «Jas ulan» respýblıkalyq mektepteriniń bazasynda taǵy eki áskerı kolledj – Baýyrjan Momyshuly atyndaǵy áskerı-sport kolledji men Talǵat Bıgeldınov atyndaǵy Áskerı kolledjdi ashý boıynsha jumys qolǵa alynǵan. Bıyl atalǵan áskerı kolledjderge negizgi orta bilim bazasynda alǵashqy qabyldaý júrgiziledi, - dedi ol Ortalyq kommýnıkatsııalar qyzmetindegi brıfıngte.
Onyń atap ótýinshe, Almaty qalasynda ornalasatyn Baýyrjan Momyshuly atyndaǵy áskerı-sport kolledjde «dene shynyqtyrý jáne sport jónindegi nusqaýshy» jáne «barlaý, desanttyq-shabýyldaý bólimshelerin basqarý» mamandyqtary boıynsha, Qaraǵandy qalasyndaǵy Talǵat Begeldınov atyndaǵy áskerı kolledjde «zymyran áskerleri men artıllerııa áskerleriniń bólimshelerin basqarý», «zattaı qamtamasyz etý» jáne «azyq-túlikpen qamtamasyz etý» mamandyqtary boıynsha áskerı qyzmetshiler daıyndalady.
- Áskerı kolledjderde oqý barysynda kadetter áskerı ant qabyldap, áskerı bılet alady. Kadetter áskerı kolledjde oqý merzimine jáne ony bitirgennen keıin on jyldyq áskerı qyzmetke kelisimshart jasasady. Áskerı kolledjderdiń túlekterine tehnıkalyq jáne kásiptik bilim týraly memlekettik úlgidegi dıplom jáne «kishi serjant» áskerı ataǵy beriledi. Sodan keıin olar kelisimshart boıynsha odan ári qyzmet ótkerý úshin Qarýly Kúshterde, sondaı-aq basqa da áskerler men áskerı quralymdarda odan ári áskerı qyzmet ótkerý úshin jiberiledi. Sondaı-aq, áskerı kolledjderdiń túlekterine konkýrstyq negizde óz mamandyqtary boıynsha qysqartylǵan oqý merzimderi bar bilim berý baǵdarlamalarymen áskerı ınstıtýttarǵa oqýǵa túsýge múmkindik beriledi, - dedi Murat Oljabaev.
Áskerı kolledjderge oqýǵa qabyldaý Qorǵanys mınıstriniń buıryǵymen bekitilgen (2016 jylǵy 22 qańtardaǵy № 35) Tıisti deńgeıdegi bilim berý baǵdarlamalaryn iske asyratyn QR QM áskerı oqý oryndaryna oqýǵa qabyldaý qaǵıdalaryna sáıkes júzege asyrylady.
Buǵan deıin 600-ge jýyq qazaqstandyq áskerı qyzmetshi shetelde bilim alyp jatqanyn jazǵan edik.