Bıyl azyq-túlik óndirisi 9,5%-ǵa artady
ASTANA. KAZINFORM — 2026 jyly egis alqaptaryn ártaraptandyrý baǵyty odan ári kúsheıtiledi: respýblıka boıynsha olardyń kólemi 23,8 mln gektarǵa deıin, al Qyzylorda oblysynda 186 myń gektarǵa deıin ulǵaıady. Bul týraly AShM baspasóz qyzmeti habarlady.
Aýyl sharýashylyǵy vıtse-mınıstri Ermek Kenjehanuly Qyzylorda oblysynyń turǵyndarymen kezdesý ótkizdi. Іs-sharaǵa óńirdiń 80-nen astam aýyl sharýashylyǵy taýaryn óndirýshisi qatysty. Ashyq formatta ótken dıalog barysynda qatysýshylar ózekti máselelerdi tikeleı kóterip, usynystaryn bildirýge múmkindik aldy.
Kezdesý barysynda Qazaqstannyń aýyl sharýashylyǵy salasy qatarynan ekinshi jyl rekordtyq kórsetkishterge qol jetkizip, salanyń turaqty ósimin aıqyn kórsetip otyrǵany atap ótildi.
2025 jyly zamanaýı agrotehnologııalardy engizý jáne jeńildetilgen qarjylandyrý kólemin keńeıtý esebinen joǵary ónim alynyp, ishki naryqtyń qajettiligi tolyq qamtamasyz etildi, sondaı-aq eksporttyq áleýet artty. 2024–2025 marketıngtik jyly astyq eksporty 15,3 mln tonnaǵa jetip, aldyńǵy kezeńmen salystyrǵanda 60%-ǵa ósti.
— 2026 jyly egis alqaptaryn ártaraptandyrý baǵyty odan ári kúsheıtiledi: respýblıka boıynsha olardyń kólemi 23,8 mln gektarǵa deıin, al Qyzylorda oblysynda 186 myń gektarǵa deıin ulǵaıady. Bul rette bıdaı egistigin qysqartyp, maıly jáne mal azyqtyq daqyldar alqaptaryn keńeıtý josparlanyp otyr, — delingen mınıstrlik habarlamasynda.
2025 jyly jeńildetilgen qarjylandyrýǵa 750 mlrd teńge baǵyttaldy, osyndaı kólem bıylǵa da qarastyrylǵan. Búginde 334 mlrd teńge somasyna 3 myńnan astam sharýa qarjylandyryldy, onyń ishinde Qyzylorda oblysynda 5,4 mlrd teńgege 36 sharýashylyq qoldaý aldy.
Sondaı-aq nesıeleý, lızıng jáne qaıta óńdeý salasyn qoldaý quraldary belsendi túrde damyp keledi. 2025 jyly 9 myń aýyl sharýashylyǵy tehnıkasy satyp alyndy, al aǵymdaǵy jyly jeńildetilgen lızıng kólemi 300 mlrd teńgeden asady.
Salany damytýǵa qosymsha serpin mal sharýashylyǵyn qoldaý arqyly beriledi — Mal sharýashylyǵyn damytýdyń keshendi josparyn iske asyrýǵa 400 mlrd teńgeden astam qarajat kózdelgen.
Jalpy alǵanda, 2026 jyly aýyl sharýashylyǵy salasynyń ósimi 5,9% deńgeıinde bolady dep kútilýde, al azyq-túlik óndirisi 9,5%-ǵa artady.
Sonymen qatar, ınvestıtsııalyq jobalar, onyń ishinde sút-taýarly fermalaryn iske qosý jobalary júzege asyrylyp jatyr. Qyzylorda oblysynda 2026 jyly agroónerkásiptik keshendi sýbsıdııalaýǵa 14,4 mlrd teńge qarastyrylǵan.
Aıta ketelik elimizde tabıǵı mýltıaqýyzdyq shıkizat pen probıotıkter qosylǵan qurama jem ázirlenip jatyr.