Bıyl Almatyda qansha eski úı súriledi
ALMATY. KAZINFORM – Megapolıste negizinen 50 jyl buryn salynǵan eski ǵımarattar iriktep alynǵan. Bul týraly Almaty qalasy ákimdigine qarasty kúrdeli qurylys kásipornynyń Kazinform saýalyna joldaǵan jaýabynda aıtylǵan.
Byltyr máslıhat sheshimimen Almaty qalasynyń 2030 jylǵa deıingi jańa turǵyn úıdi renovatsııalaý baǵdarlamasy bekitilgen.
— Atalǵan baǵdarlamaǵa 1930 jyldan 1980 jylǵa deıingi kezeńde salynǵan, eki qabatqa deıingi tozyǵy jetken nemese apatty kóppáterli turǵyn úıler, jeke turǵyn úıler, ónerkásiptik, kommertsııalyq, qoǵamdyq jáne basqa da keshendi qurylys pen ınfraqurylymdy ózgertý qajet etetin obektiler engizildi. Renovatsııaǵa kiretin nysandardyń tizbesin Almaty qalasynyń atqarýshy organy seısmoturaqtylyq boıynsha ǵylymı-zertteý ınstıtýttarynyń qorytyndylary negizinde anyqtap, ony Almaty qalasy máslıhatynyń qurylys, sáýlet, ýrbanıstıka, jer qatynastary jáne qoǵamdyq keńistikterdi damytý jónindegi turaqty komıssııasymen kelisý arqyly jergilikti atqarýshy organnyń qaýlysymen bekitedi, — delingen jaýapta.
Sondaı-aq baǵdarlamaǵa engizilgen kóppáterli úıler men basqa da renovatsııalaý nysandarynyń súrilý kezektiligi olardyń tehnıkalyq jaı-kúıin eskere otyryp, renovatsııa ofısimen belgilenedi.
Menshik ıesine tańdaý beriledi: baspana nemese ótemaqy
Jańa baǵdarlama boıynsha eski úı buzylǵanda menshik ıesinde páterin jańa páterge aýystyrý nemese naryqtaǵy baǵasyna qaraı aqshalaı ótemaqy alý múmkindigi beriledi.
Páter aıyrbastaý burynǵydaı «bólmeni bólmege» qaǵıdasy boıynsha júzege asady. Mysaly, turǵyn sanyna qaramastan 1 bólmeli páter úshin tek 1 bólmeli páter alýǵa bolady. Buryn aıyrbastaý múmkindigi ǵana bolǵan edi.
Renovatsııany bıýdjet qarjylandyrady
Renovatsııa baǵdarlamasyn qarjylandyrý ákimdikke, naqty aıtqanda kúrdeli qurylys kásipornyna aýysady (KQK). Jańa turǵyn úı salý jáne qonys aýdarý qoryna páter satyp alý úshin qarajat respýblıkalyq jáne jergilikti bıýdjetten bólinedi.
Jeke ınvestorlar tek baǵdarlama ákimshisi — «Almaty» áleýmettik-kásipkerlik korporatsııasy arqyly qatysady.
KQK ınvestorlarǵa eski úıdi satyp alý, jańa úıler men syrtqy ınjenerlik jelilerdi salý úshin nesıe beredi.
Eski úıler sanattarǵa bólinedi
Jańa baǵdarlamada barlyq eski úı mynandaı kategorııalarǵa bólingen:
— ınvestıtsııa jasaýǵa bolmaıtyn obektiler; ıaǵnı, apatty jaǵdaıdaǵy jáne seısmologııalyq jaryqta, qyzyl syzyqta ornalasqan, jer teliminiń az bóligin alyp jatqan úıler jatady. Jeke qurylys salýshylar mundaı jerlerge qyzyqpaıdy, óıtkeni ol jerge jańa turǵyn úı keshenin salý múmkin emes.
— ınvestıtsııa jasaýǵa bolatyn obektiler; jeke qurylys salýshylar tek osy sanat boıynsha turǵyn úı sala alady. Biraq jobada qabat pen halyq sany sııaqty talaptar eskerilip, qalanyń jańa bas josparyna saı bolýy kerek.
Kazinform ońtústik astanada qansha eski úı bar jáne baǵdarlamaǵa sáıkes neshe baspana buzylatyny jóninde surady.
— Qazir Almaty qalasynda 43 myńnan astam adam turatyn 1366 tozyǵy jetken úı bar, 2025 jyly baǵdarlamaǵa sáıkes 78 eski úı buzylady. Baǵdarlama aıasynda 2030 jylǵa deıin 676 eski kóppáterli turǵyn úıge renovatsııa júrgizý josparlanyp otyr, — dep jazylǵan kompanııa jaýabynda.
Eske salaıyq, Almatydaǵy eski úılerdiń 40%-dan astamy Túrksib aýdanynda ornalasqan.
Osyǵan deıin Almatynyń burynǵy ákimi buzylatyn eski úıler úsh sanatqa bólinetinin aıtqan bolatyn.